வேலூர் மாவட்டம் சத்துவாச்சாரி பகுதியைச் சேர்ந்தவர் தினேஷ்(எ) வீச்சு தினேஷ். இவரை பல்வேறு வழக்குகளின் கீழ் காவல் துறையினர் தேடிவந்த நிலையில் வேலூர் மாவட்டம் ஆற்காடு அடுத்த கீழ் புதுப்பேட்டையில் வீடு ஒன்றில் பதுங்கி இருந்தபோது காவல் துறையினர் அவரை கைது செய்தனர்.
தினேஷ் மீது கொலை, கொள்ளை, ஆள்கடத்தல் என பல்வேறு பிரிவுகளில் பல காவல் நிலையங்களில் வழக்கு நிலுவையில் உள்ளது. குறிப்பாக சில மாதங்களுக்கு முன்பு வேலூர் மாவட்டம் ஆவின் தலைமை அலுவலகம் முன்பு பாம் செல்வராஜ் என்பவர் ஓட ஓட வெட்டி கொலை செய்யப்பட்டார்.
இந்த வழக்கிலும் ரவுடி வீச்சு தினேஷ் முக்கிய குற்றவாளியாக சேர்க்கப்பட்டார். இதுதொடர்பாக வழக்குப்பதிவு செய்து, சத்துவாச்சாரி காவல் துறையினர், வீச்சு தினேஷை தீவிரமாக தேடிவந்தனர். வீச்சு தினேஷ் தற்போது காவல் துறையினரால் கைது செய்யப்பட்டுள்ளார்.
புதிய பார்முலாவை கையில் எடுக்கும் காவல்துறை இந்நிலையில், சமீபகாலமாக காவல்துறையால் கைது செய்யப்படும் குற்றவாளிகள் பாத்ரூமில் வழுக்கி விழுந்து கட்டு போடுவதுபோல் தற்போது இந்த ரவுடிக்கும் கட்டுப்போடப்பட்டு உள்ளது. ஆனால் வழக்கமான காரணத்தைக் கூறாமல் இந்த முறை ரவுடியை துரத்திப் பிடிக்கச் சென்றபோது அவர் ஓடிய கரடு முரடான பாதையில் வழுக்கி விழுந்து ரவுடி வீச்சு தினேஷுக்கு வலது கால் முறிந்ததாக காவல் துறையினர் தெரிவித்துள்ளனர்.
இதையடுத்து வேலூர் அடுக்கம்பாறை அரசு தலைமை மருத்துவமனையில் ரவுடி வீச்சு தினேஷிற்கு மாவுக்கட்டு போடப்பட்டு சிகிச்சைக்காக அனுமதித்துள்ளனர்.
இதற்கிடையில் ரவுடி வீச்சு தினேஷ் கடந்த இரண்டு, மூன்று தினங்களுக்கு முன்பே கைது செய்யப்பட்டார். ஆனாலும் மூன்று நாட்களாக அவருக்கு அடிப்பட்டது போன்ற ஃபோட்டோவை வெளியிடாமல் காவல் துறையினர் ரகசியம் காத்துவந்தனர்.
பிரபல ரவுடி என்பதால் யாரும் போட்டோ எடுக்கக்கூடாது என்று மாவட்ட காவல் கண்காணிப்பாளர் பிரவேஷ் குமார் கண்டிப்புடன் கூறியதாக தெரிகிறது. இந்நிலையில் மூன்று நாட்களுக்குப் பிறகு தற்போது ரவுடி வீச்சு தினேஷ் வலது காலில் பலத்த காயங்களுடன் மாவுகட்டு போடப்பட்டிருப்பது போன்ற புகைப்படம் தற்போது வெளியாகியுள்ளது.
