வேலூர்:தமிழ்நாட்டின் வடமாவட்டங்களில் மயானக்கொள்ளை (Mayana Kollai) திருவிழா மாசி மாதம் மகா சிவராத்திரியைத் தொடர்ந்து வரும் அமாவாசை நாளில் கொண்டாடப்படுகிறது. வேலூர் மாவட்டத்தில் வேலூர், பென்னாத்தூர், பொய்கை, குடியாத்தம், லத்தேரி உட்படப் பல பகுதிகளிலும் மயானக்கொள்ளை விழா வெகு சிறப்பாகக் கொண்டாடப்படும்.
அதன்படி வேலூரில் இன்று காலை ஓல்டுடவுன், மக்கான், கொணவட்டம், சைதாப்பேட்டை, காகிதப்பட்டறை, தோட்டுப்பாளையம், அருகந்தம்பூண்டி ஆகிய பகுதிகளில் இருந்து அங்காளம்மன் புஷ்பப் பல்லக்குகள் பவனியாக பாலாற்றங்கரைக்கு வந்தன. அதேபோல் மதியம் 1.30 மணிக்கு மேல் காட்பாடி சேனூர், கழிஞ்சூர், விருதம்பட்டு, மோட்டூர் உள்ளிட்ட பகுதிகளில் இருந்தும் அங்காளம்மன், உற்சவ மூர்த்திகள் அலங்கரிக்கப்பட்டு பூப்பல்லக்கில் பாலாற்றங்கரைக்கு ஊர்வலமாகக் கொண்டு வரப்பட்டன.
இந்த ஊர்வலத்தில் அங்காளம்மன், காட்டேரி, முனீஸ்வரன், கருப்பண்ணசுவாமி, காளி, ஆஞ்சநேயர், முருகன் என்று பல்வேறு கடவுள் வேடங்களைத் தரித்து பக்தர்கள் கலந்துகொண்டு தங்கள் நேர்த்திக்கடனைச் செலுத்தினர்.
தொடர்ந்து பாலாற்றில் படுத்த நிலையில் மண்ணால் அமைக்கப்பட்ட அங்காளபரமேஸ்வரி அம்மனுக்குச் சிறப்பு வழிபாடுகள் நடந்தன. தொடர்ந்து சூறையாடல் நிகழ்ச்சி நடந்தது. சூறையாடலின்போது பொரி உருண்டை, எலுமிச்சை, பொரி, கடலை, பழங்கள் வீசப்பட்டன.