வெட்டுக்காயத்துடன் மூதாட்டி மரணம்: பேரனுக்கு வலைவீச்சு

வேலூர்: காட்பாடி பகுதியைச் சேர்ந்த மூதாட்டி வெட்டுக்காயங்களுடன் இறந்து கிடந்தார். சந்தேகத்தின் அடிப்படையில் மூதாட்டியின் பேரனை காவலர்கள் வலைவீசி தேடிவருகின்றனர்.

காட்பாடி தாராபடவேடு திருவள்ளுவர் நகரைச் சேர்ந்தவர் சாந்தி (60), இவரது பேரன் அஜித் (20). இருவரும் தனியாக வசித்து வருகின்றனர். இந்நிலையில் இன்று (மார்ச் 30) காலை சாந்தி கழுத்தில் வெட்டுக் காயங்களுடன் இறந்து கிடந்தார்.
இதனையடுத்து அப்பகுதி மக்கள் காட்பாடி காவல் நிலையத்திற்கு தகவல் தெரிவித்தனர். இந்தத் தகவலின்பேரில் சம்பவ இடத்திற்கு விரைந்து சென்ற காவலர்கள் மூதாட்டியின் உடலை கைப்பற்றி உடற்கூராய்வு பரிசோதனைக்காக அடுக்கம்பாறை அரசு மருத்துவமனைக்கு அனுப்பி வைத்தனர்.

இந்தநிலையில், சாந்தியுடன் வசித்து வந்த அவரது பேரன் அஜித் தலைமறைவாக உள்ளது தெரியவந்துள்ளது. அஜித்திற்கு குடிப்பழக்கம் இருந்ததாகவும், அடிக்கடி மதுவிற்காக பணம் கேட்டு சாந்தியிடம் தகராறு செய்து வந்ததாகவும் கூறப்படுகிறது.

இதனால் ஏற்பட்ட தகராறில் சாந்தியை, அஜித் கொலை செய்திருக்கலாம் என காவல்துறையினருக்கு சந்தேகம் எழுந்துள்ளது. மேலும் காவல்துறையினர் வழக்குப்பதிவு செய்து தலைமறைவாக உள்ள அஜித்தை தேடி வருகின்றனர். இந்த சம்பவத்தில் வேறு யாருக்காவது தொடர்பு உள்ளதா என்ற கோணத்திலும் காவல்துறையினர் விசாரணை மேற்கொண்டு வருகின்றனர்.

இதையும் படிங்க:பட்டப்பகலில் காவலர் தூக்கிட்டுத் தற்கொலை!