சிறுமி பாலியல் தொழில் வழக்கு - தேடப்பட்டுவந்த பெண் கைது

திருப்பத்தூர்: ஆம்பூரில் 17 வயது சிறுமியை பாலியல் தொழிலில் ஈடுபடுத்திய வழக்கில் தேடப்பட்டு வந்த பெண்ணை காவல் துறையினர் ஆந்திர மாநிலம் திருப்பதியில் கைது செய்துள்ளனர்.

திருப்பத்தூர் மாவட்டம் ஆம்பூரை அடுத்த உமராபாத் பகுதியில் கர்நாடக மாநிலம் பெங்களூரைச் சேர்ந்த 17 வயது சிறுமியை பாலியல் தொழிலில் ஈடுபடுத்திய வழக்கில் அதிமுக மாவட்ட பிரதிநிதி பிரேமா மற்றும் சிறுமியின் தாய் லதா ஆகியோர் கடந்த மாதம் 31ஆம் தேதி கைது செய்யப்பட்டனர்.

இதனால் பிரேமா மாவட்ட பிரதிநிதி பதவியிலிருந்து நீக்கப்பட்டார். மேலும், இந்த வழக்கில் தொடர்புடைய காட்பாடி காந்திநகர் பகுதியைச் சேர்ந்த லட்சுமி என்பவரைக் காவல் துறையினர் தேடி வந்தனர். அதைத்தொடர்ந்து காவல் துறையினர் இன்று லட்சுமியின் செல்போன் சிக்னலை வைத்து அவர் ஆந்திர மாநிலம் திருப்பதியில் இருப்பதைக் கண்டறிந்தனர்.

உடனே தனிப்படை காவல் துறையினர் அங்கு விரைந்து அவரைக் கைது செய்து ஆம்பூர் அனைத்து மகளிர் காவல் நிலையத்திற்கு அழைத்துவந்தனர். அதன்பின் அவர், குற்றவியல் நீதிமன்றத்தில் ஆஜர்படுத்தப்பட்டு வேலூர் பெண்கள் மத்திய சிறையில் அடைக்கப்பட்டார்.

இதையும் படிங்க:12 வயது சிறுமிக்கு பாலியல் வன்புணர்வு - நான்கு பேர் கைது