முருகன் மீது காவல்துறை வழக்குப் பதிவு!

முன்னாள் பிரதமர் ராஜிவ் காந்தி கொலை வழக்கில் ஆயுள் தண்டனை அனுபவித்துவரும் முருகன் மீது பல்வேறு பிரிவுகளின் கீழ் பாகாயம் காவல்துறையினர் வழக்குப்பதிவு செய்துள்ளனர்.

முன்னாள் பிரதமர் ராஜிவ் காந்தி கொலை வழக்கில் ஆயுள் தண்டனை பெற்று வேலூர் மத்திய சிறையில் உள்ள முருகன் தன்னை காணொலி வாயிலாக குடும்பத்தாருடன் பேச சிறைத்துறை அனுமதிக்க வேண்டும் உள்ளிட்ட பல்வேறு கோரிக்கைகளை வலியுறுத்தி கடந்த நவம்பர் 23ஆம் தேதி முதல் உண்ணாவிரதம் இருந்து வருகிறார்.

இந்நிலையில் முருகன் மீது பாகாயம் காவல் நிலையத்தில் பல்வேறு பிரிவுகளின் கீழ் வழக்குப் பதிவு செய்யப்பட்டுள்ளது. சிறையில் உண்ணாவிரதம் மேற்கொண்டு வரும் முருகனை சிறை சட்டதிட்டத்தின் அடிப்படையில் சிறைக்காவலர் ஒருவர் தொடர்ச்சியாக கேமிரா மூலம் வீடியோ எடுத்து வந்தார்.

இன்று காலை முருகன் அறையில் உள்ள மற்றொரு ஆயுள் தண்டனை கைதி குப்பை தொட்டியில் ஏதோ ஒரு பொருளை வீசியுள்ளார். இதை கவனித்த சிறைக்காவலர், சிறை அலுவலரிடம் கூறியுள்ளார். இதன் அடிப்படையில் சோதனை செய்யவதற்காக பெண் சிறைக் காவலர்கள் சிலர் முருகனின் அறைக்குச் சென்றுள்ளனர். அப்போது நிர்வாணமாக இருந்த முருகன் அறையில் இருந்த சிலப் பொருட்களை எடுத்து பெண் காவலர்கள் மீது வீசியுள்ளார்.

இதனையடுத்து, சிறைதுறை அளித்த புகாரின் அடிப்படையில் அவர் மீது அரசு ஊழியர்களை பணி செய்ய விடாமல் தடுத்தது, பெண்களின் மாண்பைக் குலைக்கும் வகையில் நடந்து கொண்டது உள்ளிட்ட பிரிவுகளின் கீழ் பாகாயம் காவல்துறையினர் வழக்குப்பதிவு செய்து விசாரணை நடத்தி வருகின்றனர்.

இதனை தொடர்ந்து தனிமை சிறையில் அடைக்கப்பட்டுள்ள முருகனின் உயிரை காக்க முதலமைச்சர் நடவடிக்கை எடுக்க வேண்டும் என அவரது வழக்குரைஞர் புகழேந்தி வேண்டுகோள் விடுத்துள்ளார்.

இதையும் படிங்க:ராஜிவ் காந்தி கொலை குற்றவாளி முருகன் உண்ணாவிரதம்!