ஜல்லிக்கட்டு: காளை முட்டியதில் சிறுமி உள்பட 30 பேர் காயம்

திருச்சி: பொத்தமேட்டுப்பட்டியில் நடைபெற்ற ஜல்லிக்கட்டில், காளை முட்டி சிறுமி உள்பட 30 பேர் காயமடைந்துள்ளனர்.

திருச்சி மாவட்டம் மணப்பாறை அருகே பொத்தமேட்டுப்பட்டி புனித வியாகுல மாதா ஆலய திடலில் ஜல்லிக்கட்டு நடைபெற்றது. இந்த ஜல்லிக்கட்டை மணப்பாறை வட்டாட்சியர் தமிழ் கனி கொடியசைத்து தொடங்கிவைத்தார். கோவில் காளையைத் தொடர்ந்து திருச்சி, திண்டுக்கல், புதுக்கோட்டை, கரூர் உள்ளிட்ட மாவட்டங்களிலிருந்து வரவழைக்கப்பட்ட 650 காளைகள் ஒன்றன்பின் ஒன்றாக வாடிவாசலில் கட்டவிழ்த்து விடப்பட்டன.

ஜல்லிக்கட்டில் 400 மாடுபிடி வீரர்கள் பங்கேற்று காளைகளை அடக்கினர். போட்டியில் வீரர்களிடம் அடங்கமறுத்து வெற்றிபெறும் மாட்டின் உரிமையாளர்களுக்கும், வாடிவாசலில் சீறிபாய்ந்து காளையை அடக்கிய காளையர்களுக்கும் சைக்கிள், கட்டில், பீரோ, மிக்சி, மின்விசிறி, அண்டா, சேர், குக்கர் உள்ளிட்ட நூற்றுக்கணக்கான பரிசுகள் வழங்கப்பட்டன. ஜல்லிக்கட்டில் சிறந்த மாடு, சிறந்த மாடுபிடி வீரருக்கு சிறப்புப் பரிசாக 2 கிராம் தங்க மோதிரம் வழங்கப்பட்டது.

காளை மாடுகள் சீறிப்பாய்ந்து முட்டியதில் மாடுபிடி வீரர்கள், வேடிக்கை பார்த்தவர்கள் என 30 பேர் காயமடைந்துள்ளனர். இதில், காயமடைந்த ஐந்து வயது சிறுமி மணப்பாறை அரசு மருத்துவமனையில் சிகிச்சைக்காக அனுமதிக்கப்பட்டுள்ளார். மேலும், திருச்சி காவல் கண்காளிப்பாளர் ஜியாவுல் ஹக் தலைமையில் 300க்கும் மேற்பட்ட காவல் துறையினர் பாதுகாப்புப் பணியில் ஈடுபட்டிருந்தனர்.