லாரி மீது கார் மோதி விபத்து : 3 பேர் பலி!

திருச்சி : முசிறி அருகே லாரி மீது கார் மோதிய விபத்தில், மூன்று பேர் சம்பவ இடத்திலேயே உயிரிழந்தனர்.

சேலம் மாவட்டம், அரிசிபாளையம் பகுதியைச் சேர்ந்த சதீஷ்குமார், பிரபு, பழனிச்சாமி, கோபால் ,பிரபாகரன். ராஜலிங்கம், மணி ஆகிய ஏழு பேரும், தஞ்சை மாவட்டம் கும்பகோணத்திலுள்ள தங்களது நண்பர் வீட்டு துக்க நிகழ்வில் கலந்து கொள்வதற்காக காரில் சென்றுள்ளனர்.

அந்தக் காரை பிரபு என்பவர் ஓட்டிச் சென்றார். இந்நிலையில், கார் நேற்றிரவு (அக்.05) திருச்சி மாவட்டம், முசிறயை அடுத்த உமையாள்புரம் பகுதியில் சென்றுகொண்டிருந்தபோது, கட்டுப்பாட்டை இழந்து எதிரே வந்த லாரியின் மீது நேருக்கு நேர் மோதியது.

இந்த விபத்தில், சதீஷ்குமார், பிரபு, பழனிச்சாமி ஆகிய மூவரும் சம்பவ இடத்திலேயே உயிரிழந்தனர். மேலும், கோபால், ராஜலிங்கம், மணி, பிரபாகரன் ஆகிய நான்கு பேரும் பலத்த காயங்களுடன் திருச்சி அரசு மருத்துவமனையில் அனுமதிக்கப்பட்டுள்ளனர்.

அங்கு, அவர்களுக்கு மருத்துவர்கள் தீவிர சிகிச்சையளித்து வருகின்றனர். இச்சம்பவம் குறித்து, வழக்குப் பதிவு செய்த முசிறி காவல் துறையினர் விபத்து குறித்து விசாரணை நடத்தி வருகின்றனர்.

இதையும் படிங்க: விழுப்புரத்தில் கார் விபத்து - இளைஞர் உயிரிழப்பு