"சசிகலா திரும்பக் கேட்டதால் முதல்வர் பதவியை விட்டுக்கொடுத்தேன்; இபிஎஸ் ஒரு நம்பிக்கை துரோகி" திருச்சி மாநாட்டில் ஓபிஎஸ் பேச்சு

திருச்சி ஜி கார்னர் மைதானத்தில் நேற்று ஓ.பன்னீர்செல்வம் அணியினரின் மாநாடு நடைபெற்றது. அதில் பேசிய முன்னாள் முதலமைச்சர் ஓ.பன்னீர்செல்வம், எடப்பாடி பழனிசாமி ஒரு நம்பிக்கைத் துரோகி, அரசியல் வியாபாரி, நயவஞ்சகர் என கடுமையாக விமர்சித்தார்.

திருச்சி: ஜி கார்னர் மைதானத்தில் நேற்று நடைபெற்ற ஓபிஎஸ் அணியின் மாநாட்டில் ஓ.பன்னீர்செல்வம் மற்றும் வைத்திலிங்கம், மனோஜ் பாண்டியன், ஜேசிடி பிரபாகரன், பண்ருட்டி ராமச்சந்திரன், கு.ப.கிருஷ்ணன், வெல்லமண்டி நடராஜன் மற்றும் ஓபிஎஸ் மகன் ரவீந்திரநாத் உள்ளிட்ட ஏராளமானோர் கலந்துக்கொண்டனர்.

முன்னதாக திருச்சி மத்திய பேருந்து நிலையம் அருகில் உள்ள தனியார் ஹோட்டலில் இருந்து புறப்பட்ட ஓ.பன்னீர்செல்வத்திற்கு வழி நெடுகிலும் உற்சாக வரவேற்பு அளிக்கப்பட்டது. மேலும் மாநாட்டில் தொண்டர்கள் மத்தியில் நடந்துச் சென்று மேடை ஏறிய ஓபிஎஸ் முன்னாள் முதலமைச்சர்கள் எம்.ஜி.ஆர் மற்றும் ஜெயலலிதா ஆகியோரது உருவப்படத்திற்கு மலர் தூவி மரியாதை செலுத்தினார். மேலும் இந்த மாநாட்டில் எடப்பாடி பழனிசாமி அணியினர் கூட்டிய போலி பொதுக்குழு செல்லாது, புதிய பொதுக்குழு உறுப்பினர்களை நியமிக்க வேண்டும் உள்ளிட்ட 10 தீர்மானங்கள் நிறைவேற்றப்பட்டன.

இதனைத் தொடர்ந்து மேடையில் பேசிய ஓ.பன்னீர்செல்வம், "ஆயிரம் காலத்து பயிராக, ஒன்றரை கோடி தொண்டர்களின் உயிராக அற்புத சக்தியாக விளங்குகிறது அதிமுக. வீழ்வது நாமாகினும் வளர்வது அதிமுகவாக இருக்கட்டும். கழகத்தின் தலைமைக்கு யார் வர வேண்டும் என்ற சட்டத்தினை வகுத்தவர் எம்ஜிஆர், அதனை சட்டமாக்கியவர் ஜெயலலிதா அவர்கள். தமிழக அரசியல் வரலாற்றில் ஒரு தனிப்பட்ட இயக்கம், கட்சி 30 ஆண்டுகளுக்கு மேலாக ஆண்ட பெருமை பெற்ற ஒரே கட்சி அதிமுக தான் என்றார்.

தொடர்ந்து பேசிய அவர், இந்த இயக்கத்தை ஒன்றரை கோடி தொண்டர்கள் கொண்ட கட்சியாக உருவாக்கி தந்தவர் ஜெயலலிதா என்றும், இந்தத் தொண்டர்கள் தான் இயக்கத்தின் உயிர் நாடி, ஆணிவேர். நீங்கள் தான் இயக்கத்தை தாங்கி பிடித்துக் கொண்டிருக்கிறீர்கள் அதனால் தான் யார் தலைமைக்கு வர வேண்டும் என்ற தேர்வு செய்யும் உரிமையை தொண்டர்களுக்கு தந்து இருக்கிறார்கள் என்று கூறினார்.

கழகத்தின்(அதிமுக) நிரந்தர பொதுச்செயலாளர் ஜெயலலிதா தான் என உண்மையான பொதுக்குழுவில் தீர்மானம் நிறைவேற்றினோம். அதற்குப் பின்னால் வந்த அரசியல் வியாபாரிகள், அரசியல் வியாபாரத்திற்காக, நயவஞ்சகர்கள், நம்பிக்கை துரோகிகள் அதனை மாற்றுகின்ற வகையில் உள்ளார்கள். ஜெயலலிதா இருமுறை முதல்வர் ஆக்கினார். மூன்றாவது முறை சின்னம்மா(சசிகலா) தான் என்னை முதலமைச்சராக ஆக்கினார்கள், திரும்ப கேட்டார்கள் நான் கொடுத்துவிட்டு வந்து விட்டேன் என்று பேசினார்.

பொதுச் செயலாளர் அந்தஸ்தை நீங்கள் தான் வழங்கினீர்கள், அதனை நீக்கும் வகையில் கல்நெஞ்சகாரர்களாக இன்று ரத்து செய்துள்ளார்கள். அவர்களை ஓட ஓட விரட்டும் காலம் வெகு தூரத்திற்கு இல்லை. பன்னீர்செல்வத்தை தொண்டனாக பெற்றதில் நான் செய்த பாக்கியம் என ஜெயலலிதா சொன்னார்கள், முதலமைச்சர், நிதி அமைச்சர், தலைவர் என்ற பதவியை ஜெயலலிதா தந்துள்ளார்கள்.

மேலும், அதிமுக விதியை வைத்துக்கொண்டு ஆடாத ஆட்டமெல்லாம் தற்போது ஆடிக்கொண்டிருக்கிறார்கள், நிதியை தவறாக பயன்படுத்திக் கொண்டிருப்பவர்களுக்கு தண்டனை வழங்க வேண்டும். எனக்கு வழங்கிய பதவியை நான் திருப்பி கொடுத்து விட்டேன், பழனிசாமி அய்யா உங்களுக்கு யார் பதவி கொடுத்தது, சசிகலா அவர்கள் உங்களுக்கு முதலமைச்சர் என்ற பதவி தந்தார்கள். அவரை பார்த்து எதையோ பார்த்து குறைக்கிறது என சொல்லுகிறாய் என்றால் நீ எவ்வளவு பெரிய துரோகி, உலகம் மன்னிக்குமா. உங்களில் ஒருவரை கழகத்தில் தலைமையாக நியமிக்க வேண்டிய பொறுப்பு எங்களுக்கு உள்ளது. தொண்டர்களோடு தொண்டராக தோள் கொடுக்கும் வகையில் என்றைக்கும் இருப்பேன்" என்று கூறினார்.

ஆதரவாளர்களின் ஆரவாரத்திற்கு இடையே தொடர்ந்து பேசிய ஓபிஎஸ், "இந்த இயக்கத்தை உயர் அதிகாரத்தில் உள்ளவர்கள் தான் தலைமைக்கு வரவேண்டும் என சட்ட விதியை திருத்திய எடப்பாடி பழனிசாமிக்கு சாவு மணி அடிப்போம், உங்களை நம்பித்தான் இந்த யுத்தத்தை தொடங்கியுள்ளோம். ஒரு குடும்பத்தின் கைப்பிடிக்குள், தனி நபரின் கைக்குள் இந்த இயக்கம் இருக்கக் கூடாது.

2000 கேடிகளையும், ரவுடிகளையும் மண்டபத்தில் உட்கார வைத்துக்கொண்டு பொதுக்குழுவா நடத்தினீர்கள்? அராஜகம் திட்டமிட்டு நடத்தப்பட்டது. அதே நேரம் சிவி சண்முகம் 23 தீர்மானம் ரத்து செய்வதாக கூறிவிட்டு சென்றுள்ளார். பணத்திமிர், இதனை அடக்கி ஒடுக்கி தானாக பாதையில் கட்சியை கொண்டுவர தொண்டர்கள் இருக்கிறார்கள்.

ஜெயக்குமார் ஒரு லூசு... அந்த லூசு சொல்லுது ஓ.பன்னீர்செல்வம் தனியே இருந்து டீ ஆத்திக்கொண்டு இருக்கிறார். இங்கு உள்ள தொண்டர்களை பாருங்கள், இது 35 மாவட்டங்களில் இருந்து வந்த கூட்டம் இது, எஞ்சி உள்ள மாவட்டங்கள் கூடுகின்ற மாநாடு விரைவில் நடக்கும்" என தெரிவித்தார்.