கத்திமுனையில் காரோடு கடத்தப்பட்ட கட்சி பிரமுகர்!

திருச்சி: திருச்சியில் ரூ.40 லட்சம் கேட்டு கத்திமுனையில் தொழிலதிபரை கடத்திய மர்ம கும்பலை காவல்துறையினர் தேடி வருகின்றனர்.

திருச்சி கேகே நகர் அருகே உள்ள கிருஷ்ணமூர்த்தி நகரைச் சேர்ந்தவர் ராஜா என்கிற அழகர்சாமி (வயது 45). இவர் விடுதலை சிறுத்தைகள் கட்சியின் மாநில வணிகர் அணி துணைச் செயலாளராக இருந்து வருகிறார். மேலும் ராஜாவும் அவரது தம்பி ரமேஷ்குமாரும் இணைந்து ரியல் எஸ்டேட், பட்டாசு விற்பனை போன்ற தொழில்களில் ஈடுபட்டு வருகின்றனர்.

இந்நிலையில் நேற்று இரவு சுமார் 8.30 மணி அளவில் திருச்சி மன்னார்புரத்தில் உள்ள அவரது அலுவலகத்திலிருந்து வீட்டிற்கு காரில் சென்று கொண்டிருந்த போது, 7 பேர் கொண்ட மர்ம கும்பல் 2 கார்களில் வந்து வழிமறித்து கத்தி, அரிவாள் போன்ற ஆயுதங்களைக் காட்டி மிரட்டி ராஜாவை அவரது காருடன் கடத்திச் சென்றுள்ளனர்.

கடத்தி சென்றவர்கள் புதுக்கோட்டை மாவட்டம் விராலிமலை அருகே வைத்து மிரட்டி, அவரிடமிருந்த ரூ.4 லட்சம் பணம் மற்றும் நகைகளை பறித்துள்ளனர். மேலும் ரூ.40 லட்சம் கொடுத்தால்தான் விடுவிப்போம் என்று கூறி மிரட்டியுள்ளனர். அப்போது அவர்கள் கேட்ட தொகையை தருவதாக அழகர்சாமி ஒத்துக்கொண்டார். இதையடுத்து அந்த கும்பல் ராஜாவை அங்கேயே காரில் இருந்து இறக்கிவிட்டு விட்டு தப்பிச் சென்றது.

பின்னர் ராஜா அவரது தம்பி ரமேஷ்குமாரை தொடர்பு கொண்டு தகவல் தெரிவித்ததையடுத்து, ரமேஷ்குமார் வேறு கார் மூலம் ராஜாவை மீட்டு திருச்சி கேகே நகர் காவல் நிலையத்திற்கு அழைத்து சென்று மர்ம கும்பல் மீது புகார் அளித்தனர். அந்த புகாரில், தன்னுடன் ஏற்கனவே தொழில் புரிந்து விலகிச் சென்ற சென்னை திருவான்மியூரைச் சேர்ந்த பட்டாசு ராஜா, அசோக் ஆகியோர் கடந்த வாரம் இது தொடர்பாக மிரட்டல் விடுத்ததாகவும், தன்னைக் கடத்திச் சென்ற கும்பலைச் சேர்ந்தவர்கள் இவர்களது பெயர்களை பயன்படுத்தினர் எனவும் புகாரில் தெரிவித்துள்ளார்.

இதனையடுத்து, தகவல் அறிந்த விடுதலை சிறுத்தைகள் கட்சி நிர்வாகிகள் பலர் கடத்தல் கும்பலை பிடிக்கக் கோரி காவல்நிலையத்தை முற்றுகையிட்டனர். இதையடுத்து உரிய நடவடிக்கை எடுக்கப்படும் என காவல்துறையினர் உறுதியளித்ததை அடுத்து அவர்கள் கலைந்து சென்றனர்.

இந்த சம்பவம் குறித்து கேகே நகர் காவல்துறையினர் வழக்குப்பதிவு செய்து விசாரணை மேற்கொண்டுள்ளனர்.