திருச்சி மத்திய சிறை வளாகத்தில் அகதிகளுக்கான சிறப்பு முகாம் சிறை உள்ளது. வெளிநாடுகளிலிருந்து கடவுச்சீட்டு(Passport) உள்ளிட்ட உரிய ஆவணங்களின்றி சட்டவிரோதமாக தமிழ்நாட்டில் தங்கியவர்கள் கைது செய்யப்பட்டு இந்த முகாமில் அடைக்கப்படுவார்கள். தற்போது இந்த முகாமில் அடைக்கப்பட்டுள்ள இலங்கை, வங்கதேசம், பல்கேரியா, சீனா ஆகிய நாடுகளைச் சேர்ந்த 70 பேர் பட்டினிப் போராட்டத்தை தொடங்கியுள்ளனர்.
சட்ட விரோதமாக கைது செய்து சிறப்பு முகாம் எனும் சிறையில் அடைத்திருப்பதாக அவர்கள் குற்றம் சாட்டியுள்ளனர். பிணை கிடைத்தும் தங்களை விடுவிக்க மறுக்கிறார்கள் என்றும், தங்களை பார்க்காமல் குடும்பத்தினர் தவித்து வருகிறார்கள் என்றும் அவர்கள் கூறுகின்றனர். மேலும் தங்களை விடுதலை செய்ய வேண்டும் என்று வலியுறுத்தி இந்தப் போராட்டத்தை தொடங்கியுள்ளதாக அவர்கள் தெரிவித்துள்ளனர்.