'திருச்சியில் கார் ஆம்புலன்ஸ் சேவை தொடங்கப்படும்'-அமைச்சர் கே.என். நேரு

திருச்சி: சென்னையில் தொடங்கப்பட்ட கார் அவசர ஊர்தி சேவை, திருச்சியிலும் தொடங்கப்படும் என அமைச்சர் கே.என்.நேரு தெரிவித்துள்ளார்.

திருச்சி தென்னூர் அண்ணா நகர் உழவர் சந்தை மைதானத்தில் உள்ளாட்சி அமைப்புகள் , தோட்டக்கலை வேளாண் வணிகம் ஆகிய துறைகள் சார்பில் வாகனங்கள் மூலம் காய்கறி விற்பனைத் தொடக்க விழா மாவட்ட ஆட்சியர் சிவராசு முன்னிலையில் இன்று (மே 24) நடைபெற்றது.

மாநில நகர்ப்புற வளர்ச்சித் துறை அமைச்சர் கே.என். நேரு வாகனங்களை கொடியசைத்து தொடங்கி வைத்தார். பின்னர் அவர் பேசுகையில், "தமிழ்நாடு முதலமைச்சராக ஸ்டாலின் பதவியேற்றது முதல் வேறு எந்தப் பணியையும் பார்க்காமல், கரோனா தொற்றை ஒழிக்கும் பணியில்தான் ஈடுபட்டு வருகிறார். கரோனா நோயாளிகளுக்கு நாள்தோறும் புதிய படுக்கை வசதிகள், ஆக்ஸிஜன் வசதிகள் ஆகியவைகள் ஏற்படுத்தப்பட்டு வருகின்றன.

சென்னையில் 108 அவசர ஊர்தி பற்றாக்குறையை சமாளிக்கும் வகையில், மாநகராட்சி மூலம் 250 கார் அவசர ஊர்தி சேவை தொடங்கப்பட்டது. அதேபோல், திருச்சி மாவட்டத்திலும் கார் அவசர ஊர்தி சேவை விரைவில் தொடங்கப்படும்" என்றார்.

மேலும், திருச்சி மாநகராட்சியிலுள்ள 65 வார்டுகளிலும் வார்டுக்கு 5 வாகனங்கள் வீதம் காய்கறி விற்பனை நடைபெறுகிறது. இந்த வாகனங்களின் எண்ணிக்கையை அதிகரிக்க நடவடிக்கை எடுக்கப்பட்டுள்ளது. மாவட்டத்தில் 203 வாகனங்களில் காய்கறி விற்பனை செய்யப்படவுள்ளது" எனத் தெரிவித்தார்.