திருச்சி கே.கே. நகர் அருகே உள்ள காந்திநகரில் சாலையோர உணவகம் நடத்திவந்தவர் உமா (35). இவரது கணவர் மாரியப்பன். இவர் அப்பகுதியில் உள்ள குடோனில் சுமைதூக்கும் தொழிலாளியாக பணியாற்றிவருகிறார்.
இந்நிலையில், அதேப் பகுதியைச் சேர்ந்த சண்முகம் என்ற ஆட்டோ ஓட்டுநருக்கும் உமாவுக்கும் இடையே மண உறவைத் தாண்டிய காதல் மலர்ந்துள்ளது. இது நாளடைவில் உறவாக மாறியுள்ளது.
இதையறிந்த மாரியப்பன் உமாவைக் கண்டித்துள்ளார். இந்நிலையில், சண்முகம் உமாவை பேசவருமாறு அழைத்துள்ளார். ஆனால், சண்முகத்தை பார்க்க மறுப்பு தெரிவித்து உமா போகாமல் இருந்துள்ளார். இதனால் ஆத்திரமடைந்த சண்முகம் அரிவாளால் உமாவை சரமாரியாக வெட்டியுள்ளார்.
உமாவின் அலறல் சத்தம் கேட்டு அருகிலிருந்தவர்கள் ஓடிவந்தனர். அதற்குள் சண்முகம் அங்கிருந்து தப்பிவிட்டார். உமா சம்பவ இடத்திலேயே உயிரிழந்தார். தகவலறிந்த கே.கே. நகர் காவல் துறையினர் விரைந்துசென்று உமாவின் உடலைக் கைப்பற்றி உடற்கூறாய்வுக்காக திருச்சி அரசு மருத்துவமனைக்கு அனுப்பிவைத்தனர்.
இது குறித்து காவல் துறையினர் வழக்குப்பதிவு செய்து சண்முகத்தை நேற்று இரவு கைது செய்தனர். கைது செய்யப்பட்ட சண்முகத்திற்கு ஏற்கனவே திருமணமாகி குழந்தைகள் இருப்பது குறிப்பிடத்தக்கது.