மருத்துவ கலந்தாய்வில் 10% இடஒதுக்கீடு வழக்கு; சுகாதாரத்துறை செயலர் பதிலளிக்க உத்தரவு!

மதுரை: மத்திய அரசின் 10% இடஒதுக்கீடு சட்டத்தை அமல்படுத்திய பிறகு, மருத்துவ மாணவ சேர்க்கைக்கான கலந்தாய்வு நடந்த உத்தரவிடக் கோரிய வழக்கில், இந்திய மருத்துவ கழகத்தின் செயலர், சுகாதாரத்துறை செயலர் பதிலளிக்க உயர்நீதிமன்ற மதுரைக்கிளை உத்தரவிட்டுள்ளது.

கன்னியாகுமரி மாவட்டம் இளஞ்சிறையை சேர்ந்த கிருஷ்ண நாயர் உயர்நீதிமன்ற மதுரை கிளையில் மனுவினைத் தாக்கல் செய்திருந்தார். அதில், ’பொருளாதாரத்தில் நலிவடைந்த உயர்சாதியினருக்கு வேலைவாய்ப்பு, கல்வி ஆகியவற்றில் 10 % இட ஒதுக்கீடு வழங்கி மத்திய அரசு சட்டம் பிறப்பித்துள்ளது.

இந்நிலையில் தமிழ்நாட்டில் மருத்துவ கல்லூரிகளில் எம்பிபிஎஸ் படிப்பிற்கான சேர்க்கை கலந்தாய்வு, முதற்கட்டமாக நாளை( ஜூலை 5) முதல் ஜூலை 12ஆம் தேதி வரை நடக்கிறது. இதில் நான் நீட் தேர்வில் 320 மதிப்பெண் பெற்று தேர்ச்சி பெற்றுள்ளேன். நான் OC பிரிவில் வரும் நிலையில், மத்திய அரசு கொண்டு வந்த பொருளாதாரத்தில் நலிவடைந்த உயர்சாதியினருக்கு வேலைவாய்ப்பு, கல்வி ஆகியவற்றில் 10 % இட ஒதுக்கீடு வழங்கும் சட்டத்தின் அடிப்படையில் தமிழ்நாட்டில் மருத்துவ கல்லூரிகளில், மருத்துவ மாணவர் சேர்க்கை கலந்தாய்விற்கு விண்ணப்பித்து இருந்தேன்.

இது குறித்து எனக்கு இதுவரை எந்தவித தகவலும் வரவில்லை. விசாரித்துப் பார்த்ததில் தமிழ்நாட்டில் உள்ள மருத்துவ கல்லூரிகளில் மத்திய அரசின் இட ஒதுக்கீட்டு சட்டம் பின்பற்றவில்லை என தெரியவந்தது. ஆனால் பிற மாநிலங்களில் இந்திய மருத்துவ கழகத்தின் அறிவுறுத்தலின் படி இந்த இட ஒதுக்கீட்டு முறை பின்பற்றப்படுகிறது. தமிழ்நாட்டில் இந்த முறை பின்பற்றப்படாததால் எனது மருத்துவ கனவு சிதைந்துவிட்டது. எனவே மத்திய அரசின் 10% இடஒதுக்கீடு சட்டத்தை அமல்படுத்திய பிறகு, அதனடிப்படையில் மருத்துவ மாணவ சேர்க்கைக்கான கலந்தாய்வு நடத்த உத்தரவிட வேண்டும்’ என கூறியிருந்தார்.

இந்த மனுவை இன்று விசாரித்த நீதிபதி, இது குறித்து இந்திய மருத்துவ கழகத்தின் செயலர், சுகாதாரத்துறை செயலர் பதில்மனு தாக்கல் செய்ய உத்தரவிட்டு வழக்கு விசாரணையை ஒரு வாரத்திற்கு ஒத்திவைத்தார்.