இது தொடர்பாக அவர் இன்று (ஆகஸ்ட் 1) வெளியிட்டுள்ள அறிக்கையில், "தாய்மொழியை காக்க 21 பேர் தீக்குளித்தும் 700க்கும் மேற்பட்டவர்கள் நெஞ்சில் குண்டடி தாங்கியும் போராட்ட களத்தில் வீர மரணம் அடைந்த இந்தி திணிப்பை எதிர்த்த போர் தமிழ் மண்ணில் மட்டுமே நடந்த ஒன்று. அதேபோல, அறமற்ற முறையில் நீட்டை திணித்த போதும் அறிவில் சிறந்த எங்கள் வீட்டுப் பெண் பிள்ளைகள் 10க்கும் மேற்பட்டோர் நஞ்சருந்தியும், தூக்கிட்டும் தங்கள் உயிரை மாய்த்து இந்திய அதிகார வர்க்கத்திற்கு கடும் எதிர்ப்பை தெரிவித்தனர். தமிழ்நாட்டிற்காக மட்டும் ஒட்டுமொத்த இந்திய துணைக்கண்டத்தில் உள்ள அனைத்து தேசிய இன மக்களின் உரிமைகளை காக்கவும் தான் இந்த எதிர்குரல் எழும்பியன.
அப்படிப்பட்ட இந்தி திணிப்பை விடவும், நீட் எமனை விடவும் ஆயிரம் மடங்கு குரூரமானது புதிய தேசிய கல்விக்கொள்கை திட்டம். எவ்வளவு கொடுத்தாலும் அழியாத செல்வம் கல்விச் செல்வத்தை தனியார் தொழில் நிறுவனங்கள் தங்கள் செல்வத்தை பெருக்கிக்கொள்ள வசதிகளை செய்து தருவது ஒரு அறமற்ற செயல். மூன்றாண்டு இளநிலையை நான்காண்டு படிப்பதாலோ, எம்.பில் படிப்பை நிறுத்துவதாலோ, அவரவர் தாய்மொழியின் மீது கட்டாயமாய் பிரிதொரு மொழியை சேர்ப்பதாலோ கல்வித்துறையில் என்ன மாற்றம் நிகழ்ந்துவிடும் என்பதுதான் சாமானியர்களின் கேள்வி. மக்களுக்கு உயிர் பயத்தை கொடுத்து விட்டு தொடர்ந்து அவர்களின் உரிமைகளை பறிக்கின்ற மட்டரகமான ஒரு நிலையை மத்திய அரசு கையில் எடுத்திருப்பது கடுமையான கண்டனத்திற்குரியது.
மத்தியில் ஆளும் பா.ஜ.க அரசு, ஆர்.எஸ்.எஸ். சனாதன சக்திகளின் திட்டங்களை நிறைவேற்ற கரோனா கிருமி பரவலை ஒரு கேடயமாக பயன்படுத்தி வருவதை இத்துடன் நிறுத்திக்கொள்ள வேண்டும். ஒரு நாட்டின் தலையெழுத்தை தீர்மானிக்கின்ற துறை கல்வித்துறை, அந்தத் துறையில் கொண்டுவரப்படும் மாற்றங்களுக்கு பல நீண்ட விவாதங்களும், சட்டப்பேரவை - நாடாளுமன்ற கூட்டத்தொடர்களும் பல மாதங்கள் இடைவெளியின்றி நடத்தப்பட்டு மக்கள் மன்றத்தில் விவாதிக்கப்பட்டு கல்வியாளர்களால் திருத்தம் மேற்கொண்டு கவனமாக கையாளப்பட வேண்டிய ஒரு திட்டத்தை, போகிற போக்கில் ஒரு அரசு அறிவித்து விட்டு போகிறதென்றால் இது கல்விக் கொள்கையா? இனி போதிக்கப் போவது கொள்ளை கல்வியா? என்கிற கேள்விதான் விகாரமாக எழுகிறது.