எல்.முருகன் பெற்ற வாக்கு எத்தனை? திருப்பூர் தேர்தல் விவரங்கள்!

திருப்பூர்: தாராபுரத்தில் போட்டியிட்ட பாஜக மாநில தலைவர் எல்.முருகன் தோல்வியடைந்தார். மாவட்டத்தில் உள்ள 8 தொகுதிகளில், 5 தொகுதிகளை அதிமுகவும், 3 தொகுதிகளை திமுகவும் கைப்பற்றியுள்ளது.

திருப்பூர் மாவட்டத்தில் ஆண் வாக்காளர்கள் 11 லட்சத்து 66 ஆயிரத்து 417 பேரும், பெண் வாக்காளர்கள் 11 லட்சத்து 93 ஆயிரத்து 104 பேர், மூன்றாம் பாலினத்தவர் 283 என, மொத்தம் 23 லட்சத்து 59 ஆயிரத்து 804 பேர் உள்ளனர். இதில் 8 லட்சத்து 26 ஆயிரத்து 798 ஆண் வாக்காளர்கள், 8 லட்சத்து 17,255 பெண் வாக்காளர்கள் மற்றும் மூன்றாம் பாலினத்தவர் என, மாவட்டம் முழுவதும் 16 லட்சத்து 44,085 பேர் வாக்களித்தனர்.

மாவட்டம் முழுவதும் 7 லட்சத்து 15 ஆயிரத்து 719 பேர் வாக்களிக்கவில்லை. சதவிகிதமாக பார்த்தால், ஆண் வாக்கு சதவீதம் 70.88. விழுக்காடு, பெண் வாக்கு சதவீதம் 68.49 விழுக்காடு, மூன்றாம் பாலினம் 11.30 விழுக்காடு மொத்தம் சாரசரி 69.67 விழுக்காடு ஆகும். எட்டு தொகுதிகளுக்கான வாக்கு எண்ணிக்கை நேற்று (மே.2) பல்லடம் சாலையிலுள்ள எல்.ஆர்.ஜி கலைக் கல்லூரியில் நடைபெற்றது.

எட்டு தொகுதிகளில் அவிநாசி, திருப்பூர் வடக்கு, பல்லடம், மடத்துக்குளம், உடுமலைப்பேட்டை ஆகிய ஐந்து தொகுதிகளை அதிமுக கைப்பற்றியது. திருப்பூர் தெற்கு, காங்கேயம், தாராபுரம் ஆகிய தொகுதிகளை திமுக கைப்பற்றியது. அவிநாசி தொகுதியில், அதிமுக சார்பில் போட்டியிட்ட தனபால் ஒரு லட்சத்தி 16 ஆயிரத்து 674 வாக்குகளையும், ஆதித்தமிழர் பேரவை அதியமான் 65ஆயிரத்து 513 வாக்குகளையும் பெற்றனர்.

திருப்பூர் வடக்கில், அதிமுக சார்பில் விஜயகுமார் போட்டியிட்டு ஒரு லட்சத்து 12ஆயிரத்து 766 வாக்குகளையும், இந்தியக் கம்யூனிஸ்ட் கட்சி சார்பில் போட்டியிட்ட ரவி என்கிற சுப்ரமணியன் 72 ஆயிரத்து 364 வாக்குகளையும் பெற்றனர். திருப்பூர் தெற்கில், திமுக சார்பில் போட்டியிட்ட செல்வராஜ் 74 ஆயிரத்து 757 வாக்குகளையும், அதிமுக சார்பில் போட்டியிட்ட குணசேகரன் 70 ஆயிரத்து 397 வாக்குகளையும் பெற்றனர்.

பல்லடம் தொகுதியில் அதிமுக சார்பில் போட்டியிட்ட முன்னாள் அமைச்சர் எம்.எஸ்.எம் ஆனந்தன், ஒரு லட்சத்து 26 ஆயிரத்து 910 வாக்குகளையும், மதிமுக சார்பில் போட்டியிட்ட முத்து ரத்தினம் 94 ஆயிரத்து 212 வாக்குகளையும் பெற்றனர். உடுமலைப்பேட்டையில் அமைச்சர் ராதாகிருஷ்ணன் 96 ஆயிரத்து 893 வாக்குகளையும், காங்கிரஸ் சார்பில் போட்டியிட்ட தென்னரசு 74 ஆயிரத்து 998 வாக்குகளையும் பெற்றனர்.

மடத்துக்குளத்தில் அதிமுக சார்பில் போட்டியிட்ட மகேந்திரன் 84 ஆயிரத்து 313 வாக்குகளையும், திமுக சார்பில் ஜெயராமகிருஷ்ணன் போட்டியிட்டு 77 ஆயிரத்து 875 வாக்குகளையும் பெற்றனர். காங்கேயம் தொகுதியில், திமுக சார்பில் போட்டியிட்ட முன்னாள் அமைச்சர் மு.பெ.சாமிநாதன் 94 ஆயிரத்து 197 வாக்குகளையும், அதிமுக சார்பில் போட்டியிட்ட ஏ.எஸ்.ராமலிங்கம் 86 ஆயிரத்து 866 வாக்குகளையும் பெற்றனர்.

பெரிதும் எதிர்பார்க்கப்பட்ட தாராபுரம் தொகுதியில், பாஜக மாநில தலைவர் எல்.முருகன், திமுக வேட்பாளர் கயல்விழி செல்வராஜுடம் தோல்வியடைந்தார். முன்னதாக, 25 சுற்றில் ஒரு இயந்திரம் பழுது காரணமாக வாக்கு எண்ணிக்கை நிறுத்தப்பட்டு, இறுதி நிலவரம் வர காலதாமதம் ஆனது. இதற்கிடையில், தாராபுரம் தொகுதியில் தபால் ஓட்டு எண்ணிக்கையையும், இயந்திர வாக்கு எண்ணிக்கையையும் மீண்டும் நடத்தக் கோரி தேர்தல் நடத்தும் அலுவலரிடம் கோரிக்கை மனு கொடுக்கப்பட்டது.

ஆனால் அந்த கோரிக்கைகள் நிராகரிக்கப்பட்டு இறுதி நிலவரம் அறிவிக்கப்பட்டது. அதன் அடிப்படையில், தபால் வாக்கு எண்ணிக்கையோடு சேர்த்து திமுக வேட்பாளர் கயல்விழி செல்வராஜ் 89ஆயிரத்து 986 வாக்குகளையும் , எல்.முருகன் 88ஆயிரத்து 593 வாக்குகளையும் பெற்றுள்ளனர். இதனால், 1,393 வாக்குகள் வித்தியாசத்தில் எல்.முருகன் தோல்வியடைந்தார்.