கரிசனம் காட்டிய கோடைமழை; தீவிரமாகும் உழவுப்பணி!

திருப்பூர்: அவினாசி, ஊத்துக்குளி மற்றும் மூலனூர் சுற்று வட்டார பகுதிகளில் கடந்த சில நாட்களாக சாரலுடன் கூடிய கோடை மழை பெய்து வருவதால் விவசாயிகள் உழவு பணிகளில் தீவிரம் காட்டி வருகின்றனர்.

திருப்பூர் மாவட்டத்தில் கடந்த சில நாட்களாக கத்திரி வெயில் வாட்டி வதைத்தது. தற்போது மாவட்டத்தின் சில பகுதிகளில் தொடர்ச்சியாக அவ்வப்போது மிதமான மழை பெய்து வருகிறது. இந்நிலையில் நேற்றுமுன்தினம் மூலனூர் மற்றும் அதன் சுற்றுவட்டாரப் பகுதிகளில் சுமார் 2மணி நேரத்துக்கு மேலாக கன மழை பெய்தது.

இதனால் அந்த பகுதியில் இருந்த சிறு ஒடைகள் அனைத்திலும் தண்ணீர் நிரம்பியுள்ளது. இந்த தண்ணீரை வைத்து விவசாயிகள் கோடை உழவுப்பணிகளை மேற்கொண்டு வருகின்றனர். அவ்வபோது இடையில் சாரல் மழையும் பெய்வதால் உழவு பணிகளை தீவிரம் காட்டி வருகின்றனர்.