திருப்பூரில் மருத்துவர்கள் தர்ணா -நோயாளிகள் அவதி

திருப்பூர்: மருத்துவமனை பாதுகாப்பு சட்டம் இயற்றக் கோரி இந்திய மருத்துவ சங்கத்தின் சார்பில் திருப்பூர் ரயில் நிலையம் முன்பு தர்ணா போராட்டத்தில் ஈடுபட்ட சம்பவம் பரபரப்பை ஏற்படுத்தியது.

கொல்கத்தாவில் உள்ள மருத்துவக் கல்லூரி மருத்துவமனையில் நோயாளி ஒருவர் சிகிச்சைப் பலனின்றி உயிரிழந்தார். இதனால், அதிர்ச்சி அடைந்த அவரது உறவினர்கள் பயிற்சி மருத்துவர்களைக் கடுமையாகத் தாக்கினர். இந்தத் தாக்குதலில் பயிற்சி மருத்துவர்கள் காயமடைந்தனர். இதையடுத்து, அவர்களுக்கு உரிய பாதுகாப்பு வழங்கக் கோரி அரசு மருத்துவர்கள் நாடு தழுவிய போராட்டத்தில் ஈடுபட்டுள்ளனர்.

இந்நிலையில், மருத்துவக்கல்லூரி பயிற்சி மருத்துவர் பிரதிபா முகர்ஜி தாக்கப்பட்டதைக் கண்டித்து திருப்பூரில் இந்திய மருத்துவர் சங்கத்தின் சார்பில் ரயில் நிலையம் அருகே தர்ணா போராட்டத்தில் ஈடுபட்டனர். அப்போது, இதுபோன்ற தாக்குதல் சம்பவத்திற்கு மத்திய அரசு மருத்துவமனை பாதுகாப்பு சட்டம் கொண்டுவர வலியுறுத்தப்பட்டது.

மேலும், இந்தப் போராட்டத்திற்கு மருத்துவர் சங்கத்தின் மாவட்டத் தலைவர் செந்தில்குமரன் தலைமை வகித்தார். செயலர் ராஜ்குமார், பொருளாளர் ரமேஷ், பொம்மை சாமி உள்ளிட்ட 300க்கும் மேற்பட்ட மருத்துவர்கள் இந்தப்போராட்டத்தில் கலந்து கொண்டனர்.

திருப்பூர் மாவட்டம் முழுவதும் சுமார் 450 மருத்துவமனைகளில் பணியாற்றக்கூடிய ஆயிரத்துக்கும் மேற்பட்ட மருத்துவர்கள் 24 மணி நேர வேலை நிறுத்த போராட்டத்தில் கலந்து கொண்டுள்ளதால் நோயாளிகள் மிகவும் அவதிப்பட்டு வருகின்றனர்.