சொத்து தகராறில் தந்தை அடித்துக் கொலை; மகன் தலைமறைவு!

திருப்பூர்: உடுமலை அருகே சொத்து தகராறில் தந்தையை அடித்துக் கொலை செய்துவிட்டு தலைமறைவான மகனை காவல் துறையினர் தேடிவருகின்றனர்.

திருப்பூர் மாவட்டம் உடுமலை அருகேவுள்ள கிருஷ்ணாபுரத்தைச் சேர்ந்த விவசாயி கோதண்டசாமி (65). இவருக்கு சக்திவேல் குமார்(22) என்ற மகனும் ஒரு மகளும் உள்ளனர். கடந்த சில மாதங்களாகவே கோதண்டசாமியிடம் சக்திவேல் சொத்தை தனது பெயருக்கு எழுதித்தருமாறு கேட்டு தகராறில் ஈடுபட்டுவந்ததாகவும், கோதண்டசாமி தொடர்ந்து இதற்கு மறுத்துவந்ததாகவும் தெரிகிறது.

இன்று வழக்கம்போல இவர்கள் இருவருக்கும் ஏற்பட்ட தகராறில் வாக்குவாதம் முற்றியதால் ஆத்திரமடைந்த சக்திவேல் அருகில் கிடந்த தடியை எடுத்து கோதண்டசாமி தலையின் பின்புறத்தில் தாறுமாறாக அடித்துள்ளார். இதனால் நிலைகுலைந்த கோதண்டசாமி அலறிக்கொண்டே ரத்த வெள்ளத்தில் கீழே விழுந்து உயிரிழந்தார்.

அவரது அலறல் சத்தம் கேட்டு விரைந்த அக்கம்பக்கத்தினர் காவல் துறையினருக்கு தகவலளித்தனர். இதையறிந்த சக்திவேல் காவல் துறையினரிடமிருந்து தப்பிக்க தலைமறைவாகியுள்ளார்.

பின்னர், இச்சம்பவம் குறித்து வழக்குப்பதிவு செய்த காவல் துறையினர் கோதண்டசாமியின் உடலை மீட்டு உடற்கூறாய்விற்காக உடுமலை அரசு மருத்துவமனைக்கு அனுப்பிவைத்தனர். மேலும், தலைமறைவாகியுள்ள சக்திவேல் குமாரையும் தீவிரமாகத் தேடி வருகின்றனர்.