பட்டா கத்தியால் பெட்ரோல் பங்க் ஊழியரை மிரட்டிய இளைஞர்கள்; வீடியோ வைரல்!

திருப்பூர்: பெருமாநல்லூர் அருகே உள்ள பெட்ரோல் பங்கில் கடந்த மூன்று நாட்களுக்கு முன்பு நள்ளிரவில் பெட்ரோல் நிரப்பி விட்டு பணம் கொடுக்காமல் பட்டாக்கத்தியை காட்டி இளைஞர்கள் செல்லும் வீடியோ வெளியாகி வைரலாகி வருகிறது.

திருப்பூர் மாவட்டம், பெருமாநல்லூர் அருகே ஈட்டிவீரம்பாளையம் பகுதியில் தேசிய நெடுஞ்சாலையை ஒட்டி சாமியப்பன் என்பவருக்கு சொந்தமான பெட்ரோல் பங்க் செயல்பட்டு வருகிறது. இதில் இரண்டு ஊழியர்கள் இரவு நேரத்தில் பணிபுரிவது வழக்கம். இந்நிலையில் கடந்த 13 ஆம் தேதி நள்ளிரவில் இருசக்கர வாகனத்தில் ஹெல்மெட் அணிந்து வந்த இரண்டு வாலிபர்கள் ரூ.600 பெட்ரோல் நிரப்பும்படி ஊழியரிடம் கூறியுள்ளனர். பெட்ரோலை நிரப்பிய ஊழியர் முருகேசன், அவர்களிடம் பணம் கேட்டுள்ளார்.

அப்போது பின்னால் ஹெல்மெட் அணிந்து அமர்ந்திருந்த இளைஞர், பணம் எடுப்பதுபோல் பாசாங்கு செய்துவிட்டு, மறைத்து வைத்திருந்தமூன்று அடி நீளமுள்ள பட்டாக்கத்தியை வெளியே எடுத்து காட்டி மிரட்டி விட்டு பணம் கொடுக்காமல் தப்பி சென்றனர்.இந்த சம்பவம் அங்கு பொருத்தப்பட்டுள்ள சிசிடிவி கேராவில் பதிவாகியுள்ளது.

அந்த இரண்டு இளைஞர்களும் கடந்த ஒரு வாரமாக நள்ளிரவு நேரத்தில் பெட்ரோல் பங்கை நோட்டம் விட்டபடி சென்றதாகவும், அவர்கள் பேசுவதை வைத்து, தென்மாவட்டத்தை சார்ந்தவர்கள் போல் இருப்பதாக ஊழியர்கள், காவலர்களிடம் கூறியுள்ளனர். இது குறித்து பெருமாநல்லூர் காவல் நிலையத்தில் புகார் கொடுத்தும், இதுவரை வழக்குப்பதிவு செய்யாமல் போலீசார் அலட்சியம் காட்டி வருவதாக பங்க் ஊழியர்கள் குற்றம் சாட்டியுள்ளனர்.