திருப்பூரில் போராட்டத்தில் ஈடுபட்ட 500 பேர் கைது

திருப்பூர்: நாடு தழுவிய வேலைநிறுத்தப் போராட்டத்தை முன்னிட்டு தலைமை தபால் நிலையத்தில் போராட்டத்தில் ஈடுபட்ட 500க்கும் மேற்பட்டோரை காவல் துறையினர் கைது செய்துள்ளனர்.

மத்திய அரசின் தவறான பொருளாதாரக் கொள்கைகளால் விலைவாசி உயர்ந்துள்ளதாகவும் தொழில்கள் நசிந்து விட்டதாகவும் கூறி, 12 அம்ச கோரிக்கைகளை வலியுறுத்தி இன்று நாடு தழுவிய வேலைநிறுத்தப் போராட்டத்திற்கு தொழிற்சங்கங்கள் அழைப்பு விடுத்திருந்தனர்.

இதற்கு தமிழ்நாட்டில் திமுக, காங்கிரஸ் உள்ளிட்ட கட்சிகள் ஆதரவு தெரிவித்திருந்தன. இந்நிலையில் திருப்பூரில் நகரின் முக்கிய பகுதிகளில் உள்ள பெரும்பாலான கடைகள் அடைக்கப்பட்டிருந்தன. காதர் பேட்டையில் உள்ள 500க்கும் மேற்பட்ட பனியன் கடைகள் அடைக்கப்பட்டிருந்தன. இதனால் சுமார் பத்து கோடி ரூபாய் மதிப்பிலான வர்த்தகம் பாதிக்கப்பட்டுள்ளது. அனுப்பர்பாளையம் பாத்திர தொழிலாளர்களும் வேலைநிறுத்தத்திற்கு ஆதரவு தெரிவித்ததால் அதன் உற்பத்தியும் பாதிக்கப்பட்டது.

திருப்பூர் தலைமை தபால் நிலையம் முன்பு திமுக, காங்கிரஸ், கம்யூனிஸ்ட் ஆகிய கட்சித் தொண்டர்களுடன் இணைந்து தொழிற்சங்க ஊழியர்கள் சாலை மறியலில் ஈடுபட்டனர். இதனைத் தடுக்க முயன்ற காவல் துறையினருக்கும் தொழிற்சங்கத்தினருக்கும் இடையே தள்ளுமுள்ளு ஏற்பட்டது. தொடர்ந்து சாலை மறியலில் ஈடுபட்ட 500க்கும் மேற்பட்டவர்கள் காவல் துறையினரால் கைது செய்யப்பட்டனர்.

இதையும் படியுங்க: 'பாரத் பந்த்' எதிரொலி: கேரளாவில் முழு அடைப்பு; வெறிச்சோடிய குமுளி