காங்கேயத்தில் ஒன்றிணைந்த பழனி பாதயாத்திரை பக்தர்கள்

திருப்பூர்: பழனி கோயிலுக்கு ஏழு மாவட்டத்தைச் சேர்ந்த பல்லாயிரக்கணக்கான பக்தர்கள் காங்கேயம் வழியாகப் பாத யாத்திரை பயணம் மேற்கொண்டுள்ளனர்.

அறுபடை வீடுகளில் முதன்மையானதும் புகழ்பெற்றதுமான பழனி பாலதண்டாயுதபாணி கோயில். ஆண்டுதோறும் மார்கழி மாதத்தில் பக்தர்கள் மாலை அணிந்து, பாதயாத்திரையாக காவடி சுமந்து சென்று நேர்த்தி கடன் செலுத்துவது வழக்கம்.

அதே போல், இந்த ஆண்டும் பாத யாத்திரையாக தருமபுரி, சேலம், ஈரோடு, நாமக்கல், கரூர் உள்ளிட்ட 7 மாவட்டங்களைச் சேர்ந்த முருக பக்தர்கள் குடும்பத்துடன் பாதயாத்திரை செல்கின்றனர். இவர்கள் அனைவரும் திருப்பூர் மாவட்டம் காங்கேயத்தில் ஒன்றிணைந்து செல்வதால், சாலை முழுவதும் பக்தர்கள் கூட்டம் அலைமோதுகிறது.

மேலும், பழனி சாலையில் சாரைசாரையாகச் செல்லும் பக்தர்களுக்கு உணவளிக்க சாலையோரங்களில் 3 கிலோமீட்டருக்கு ஒரு அன்னதான கூடங்களை அப்பகுதியின் தன்னார்வலர்கள் அமைத்து 3 நாள்களாகத் தொடர்ந்து உணவளித்துவருகின்றனர்.

இதையும் படிங்க: மாட்டு பொங்கலன்று சங்கமிக்கும் நாட்டு மாடுகள்!