ஆசிரியரிடம் தங்கச் சங்கிலி பறிக்க முயற்சி: இளைஞருக்கு தர்ம அடி!

திருப்பத்தூர்: ஆசிரியர் கழுத்தில் தாலி சங்கிலியை பறிக்க முயன்ற இளைஞருக்கு பொதுமக்கள் தர்ம அடி கொடுத்து காவல் துறையினரிடம் ஒப்படைத்தனர்.

திருப்பத்தூர் அடுத்த ஆசிரியர் நகர் பகுதியைச் சேர்ந்தவர் மங்கையர்க்கரசி. இவர் தனியார் பள்ளியில் ஆசிரியராகப் பணிபுரிந்துவருகிறார். மங்கையர்க்கரசி நேற்று (மார்ச்.25) மாலை ஆசிரியர் நகர் அருகே நடந்து சென்றபோது, அவ்வழியாக இருசக்கர வாகனத்தில் இரண்டு இளைஞர்கள் அவர் கழுத்தில் அணிந்திருந்த தாலி சங்கிலியை பறிக்க முயன்றுள்ளனர்.

அப்போது, தாலி சங்கிலியை இறுக்கிப் பிடித்துக்கொண்ட மங்கையர்கரசி கூச்சலிட்டதைக் கேட்டு, அங்கிருந்தவர்கள் ஓடி வந்துசங்கிலி பறிக்க முயன்ற இளைஞரை பிடித்து சராமரியாக தாக்கியுள்ளனர். இதனிடையே, மற்றொரு இளைஞர் இருசக்கர வாகனத்தில் அங்கிருந்து தப்பிச் சென்றார்.

இதையடுத்து, பிடிபட்ட இளைஞரை பொதுமக்கள் திருப்பத்தூர் நகர காவல் நிலையத்தில் ஒப்படைத்தனர். பின்னர் இது குறித்து வழக்குப்பதிவு செய்த காவல் துறையினர் தப்பி ஓடிய மற்றொரு இளைஞரை தேடி வருகின்றனர்.

இதையும் படிங்க:'பையர் ஹேர் ஸ்ட்ரெயிட்னிங்' காணொலியைப் பார்த்து முயற்சித்த சிறுவன் உயிரிழப்பு!