திருப்பத்தூர் மாவட்ட அரசு பொது மருத்துவமனையில் இரண்டாவது கட்டமாக முன் களப் பணியாளர்களுக்கு கரோனா தடுப்பூசி போடும் பணி தொடங்கப்பட்டது. திருப்பத்தூர் மாவட்ட ஆட்சியர் சிவனருள் முதலில் தடுப்பூசியை போட்டுகொண்டார். பின்னர் மாவட்ட காவல் கண்காணிப்பாளர் விஜயகுமார் கரோனா தடுப்பு ஊசியை போட்டுக்கொண்டனர்.
இவர்களைத் தொடர்ந்து மாவட்ட துணை காவல் கண்காணிப்பாளர் தங்கவேல், மாவட்ட ஆட்சியரின் நேரடி உதவியாளர் வில்சன் ராஜசேகர், கிராமிய காவல் ஆய்வாளர் சிரஞ்சீவி ஆகியோருக்கும் தடுப்பூசி போடப்பட்டு அதற்கான சான்றிதழும் வழங்கப்பட்டன.
தொடர்ந்து முன் களப்பணியாளர்கள் வரிசையில் இருக்கும் காவல்துறை, வருவாய்த்துறை, ஊரக வளர்ச்சித் துறை, ஊடகம் மற்றும் பத்திரிகை துறை ஆகிய துறைகளைச் சார்ந்த அனைத்து அலுவலர்களுக்கும் திருப்பத்தூர் மாவட்டத்திற்குட்பட்ட வாணியம்பாடி, ஆம்பூர் போன்ற பகுதிகளில் உள்ள 6 சமுதாய சுகாதார நிலையங்களிலும் 4 அரசு பொது மருத்துவமனையிலும் தடுப்பூசி போடப்பட்டது.