திருப்பத்தூர்: வாணியம்பாடி நகராட்சிக்கு உட்பட்ட காமாராஜபுரம் பகுதியில் சுமார் 500க்கும் மேற்பட்ட மக்கள் வசித்து வருகின்றனர். இந்நிலையில், அதே பகுதியில் இயங்கி வரும் தனியார் தோல் தொழிற்சாலை, கழிவுகளை உரிய முறையில் வெளியேற்றாமல், தொழிற்சாலை வளாகத்திலேயே வைத்திருப்பதாகவும், இதனால் நிலத்தடி நீர் பாதிக்கப்படுவதோடு, குடிநீர் மிகவும் மோசமான நிலையில் வருவதாகவும், அப்பகுதி மக்கள் குற்றம் சாட்டுகின்றனர்.
மேலும் இந்த தோல் தொழிற்சாலைகளில் இயங்கும் இயந்திரங்கள் மூலம் வெளியேறும் புகை துர்நாற்றம் வீசுவதாகவும், அவற்றை சுவாசிப்பதால், அப்பகுதியில் வசிக்கும் பச்சிளம் குழந்தைகள் முதல் முதியவர்கள் வரை அனைவருக்கும் வாந்தி, மயக்கம், ஆஸ்துமா மற்றும் உடல் ஒவ்வாமை போன்ற நோய்களால் பாதிக்கப்படுவதாக வேதனை தெரிவிக்கின்றனர்.
குறிப்பாக, குழந்தைகள் தெருக்களில் விளையாடும் போது, இந்த தொழிற்சாலைகளில் இருந்து வெளியாகும் புகையினை சுவாசித்து திடீரென வாந்தி எடுத்து மயங்கி விழுவதாகவும், இதனால் அடிக்கடி அக்குழந்தைகளை மருத்துவமனைக்கு அழைத்துச் செல்வதாகவும் வேதனை தெரிவிக்கின்றனர். மேலும், அப்பகுதியில் வசிக்கும் மக்கள், அதிகப்படியான பணத்தை மருத்துவமனைகளிலேயே செலவிடுவதாகவும் தெரிவிக்கின்றனர்.
இது குறித்து நடவடிக்கை எடுக்க வேண்டும் என அப்பகுதி மக்கள் பல முறை தொழிற்சாலை நிர்வாகத்தினரிடம் முறையிட்டும், எவ்வித நடவடிக்கையும் தொழிற்சாலை நிர்வாகத்தினர் மேற்கொள்ளாமல் அலட்சியம் காட்டுவதாக குற்றம் சாட்டுகின்றனர். இந்நிலையில், தொழிற்சாலையை உடனடியாக மூட கோரி காமராஜபுரம் பகுதி மக்கள், தங்களது பாதிக்கப்பட்ட குழந்தைகளுடன் தோல் தொழிற்சாலையை முற்றுகையிட்டு, தொழிற்சாலை நிர்வாகத்தினரிடம் வாக்குவாதத்தில் ஈடுபட்டனர்.