அப்பல்லோ மருந்தகத்திற்கு சீல் வைத்தார் வட்டாட்சியர்!

திருப்பத்தூர்: அப்பல்லோ மருந்தகத்திற்கு மாவட்ட ஆட்சியரின் உத்தரவின் பேரில் வட்டாட்சியர் சீல் வைத்தார்.

திருப்பத்தூர் மாவட்டம், திருப்பத்தூர் வட்டாட்சியர் அலுவலகம் எதிரில் அப்பல்லோ மருந்தகம் செயல்பட்டு வருகிறது. இந்த மருந்தகத்தில் கரோனா வைரஸ் பரவாமல் தடுக்க முகக்கவசம்(மாஸ்க்) விற்பனை செய்து வந்துள்ளனர்.

மூன்று லேயர் முகக்கவசம், இரண்டு லேயர் முகக்கவசம், மஞ்சள் முகக்கவசம் என பல்வேறு முகக்கவசங்களை விற்பனை செய்துள்ளனர். ஐந்து ரூபாய் முகக்கவசம் 20ரூபாய் முதல் 30ரூபாய் வரையிலும், 30ரூபாய் முகக்கவசம் 70ரூபாய்க்கும், 50ரூபாய் முகக்கவசம் 100ரூபாய் என விற்பனை செய்துள்ளனர்.

இது குறித்து மாவட்ட ஆட்சியர் சிவனருளுக்கு பொதுமக்கள் புகார் அளித்துள்ளனர். அதன் பேரில், மாவட்ட ஆட்சியர் வட்டாட்சியருக்கு அளித்த உத்தரவின்படி, அவர் அப்பல்லோ மருந்தகத்திற்கு விரைந்து சென்று சீல் வைத்தார். மாவட்ட நிர்வாகம் மருந்தகத்துக்கு சீல் வைத்த சம்பவம் பெரும் பரபரப்பை ஏற்படுத்தியுள்ளது.