திருப்பத்தூர்: வாணியம்பாடி சென்னாம்பேட்டை பகுதியைச் சேர்ந்தவர் வெற்றி வேல் (30). இவர் பெங்களூரில் தனியார் உணவகத்தில் ஓட்டுநராக பணியாற்றி வருகிறார். இந்நிலையில் கடந்த 18ஆம் தேதியன்று வாணியம்பாடி பேருந்து நிலையத்தில் உள்ள இருசக்கர வாகன நிறுத்தத்தில், வெற்றிவேல் தனது இருசக்கர வாகனத்தை நிறுத்திவிட்டு, ஊழியரிடம் டோக்கன் பெற்று பெங்களூர் சென்றுள்ளார்.
இன்று (அக்.26) காலை மீண்டும் வாணியம்பாடி வந்த வெற்றிவேல், இருசக்கர வாகன நிறுத்தத்திற்குச் சென்று பார்த்தபோது அங்கு நிறுத்தி வைத்திருந்த அவரது இருசக்கர வாகனம் மாயமானதைக் கண்டு அதிர்ச்சியடைந்தார். பின்னர், உடனடியாக இதுகுறித்து ஊழியரிடம் விசாரணை மேற்கொண்ட போது, அவர்கள் தங்களுக்குத் தெரியாது எனக் கூறியுள்ளனர்.