தூத்துக்குடி மாவட்டம், சாத்தான்குளம் அடுத்த தட்டார்மடத்தைச் சேர்ந்தவர் செல்வன். தண்ணீர் கேன் வியாபாரியான இவர் கடந்த சில வாரங்களுக்கு முன்பு, அதே பகுதியைச் சேர்ந்த அதிமுக பிரமுகர் திருமணவேல் என்பவரால் காரில் கடத்திச் செல்லப்பட்டு கொலை செய்யப்பட்டார்.
இதுதொடர்பாக திசையன்விளை காவல் நிலையத்தில் அளித்தப் புகாரின் பேரில் தட்டார்மடம் காவல் ஆய்வாளர் ஹரிகிருஷ்ணன், அதிமுக பிரமுகர் உள்பட 7 பேர் மீது காவல் துறையினர் வழக்குப்பதிவு செய்து விசாரணை நடத்தினர். வழக்கு விசாரணையை சிபிசிஐடி வசம் ஒப்படைத்து, தமிழ்நாடு காவல்துறை தலைவர் திரிபாதி உத்தரவிட்டார். சிபிசிஐடி காவல் துறையினர் நடத்திய விசாரணையில் காவல் ஆய்வாளர் ஹரிகிருஷ்ணன் உள்பட மற்ற அனைவர் மீதும் கொலை வழக்குப் பதிவு செய்யப்பட்டது.
கொலை சம்பவத்துக்கு உடந்தையாக இருந்த காவல் ஆய்வாளர் ஹரிகிருஷ்ணனை நெல்லை சரக டிஐஜி பணி இடைநீக்கம் செய்து உத்தரவிட்டார். வழக்கு விசாரணை தொடர்ந்து நடைபெற்று வரும் நிலையில் செல்வனின் மனைவி ஜீவிதா மற்றும் அவரது குடும்பத்தினர் மாவட்ட ஆட்சியர் அலுவலகத்தில் இன்று(அக்.19) பரபரப்பு புகார் ஒன்றை அளித்தனர்.