ககன்யான் திட்டம்: விண்வெளி வீரர்கள் தேர்வு - கே. சிவன்

தூத்துக்குடி : மனிதனை விண்ணுக்கு அனுப்பும் ககன்யான் திட்டத்திற்காக வீரர்கள் தேர்வுசெய்யப்பட்டு வருகிறார்கள் என இஸ்ரோ தலைவர் கே. சிவன் தெரிவித்துள்ளார்.

இந்திய விண்வெளி ஆராய்ச்சி மையமான இஸ்ரோவின் தலைவர் கே. சிவன் தூத்துக்குடி விமான நிலையத்தில் செய்தியாளர்களிடம் பேசுகையில்,

"இந்திய விண்வெளி ஆராய்ச்சி மைய ஊழியர்களுக்கிடையே தற்போது விளையாட்டுப் போட்டிகள் நடந்துவருகின்றன. அதன் தொடக்க நிகழ்ச்சியில் கலந்துகொண்டு திரும்பிச் செல்கிறேன்.

சந்திரயான்-2 செயற்கைக் கோளின் ஆர்பிட்டர் நன்றாக வேலை செய்துகொண்டிருக்கிறது. அதிலுள்ள கருவிகள் எல்லாம் சரியாக இயங்குகின்றன. அடுத்ததாக வருகிற நவம்பரில் பி.எஸ்.எல்.வி. ராக்கெட் மூலம் செயற்கைக்கோளை ஏவ திட்டமிட்டுள்ளோம்.

'ககன்யான்' திட்ட வேலைகள் நல்லபடியாக நடந்துவருகின்றன. ககன்யான் திட்டத்திற்கான விண்வெளி வீரர்கள் தேர்வு செய்யப்பட்டுவருகிறார்கள். தேர்வுசெய்யப்படும் வீரர்கள் பயிற்சிக்காக ரஷ்யாவிற்கு அனுப்பிவைக்கப்படுவார்கள்.

இதையும் வாசிங்க : சந்திரனை ஆய்வு செய்ய காத்திருக்கும் சிலந்தி!

ககன்யா திட்டத்தின் அடிப்படை வேலைகள் எல்லாம் பூர்த்திசெய்யப்பட்டு பரிசோதனை ஓட்டங்கள் நடைபெற்றுவருகின்றன.

தற்போது கிரையோஜெனிக், செமி கிரையோஜெனிக் என்ஜின்கள் பயன்படுத்தப்படுகின்றன. முழுவதும் மின்சாரத்தில் இயங்கும் ராக்கெட் உள்பட புதுப் புது ராக்கெட் என்ஜின்களை வடிவமைக்கும் திட்டமும் வருங்காலத்தில் உள்ளது.

மீத்தேனில் இயங்கும் ராக்கெட் என்ஜின் தயாரிக்கும் திட்டத்தையும் கொண்டுவரவுள்ளோம்" என்றார்.