காஷ்மீர் டூ கன்னியாகுமரி: பாரா ஸ்போர்ட்ஸை ஊக்குவிக்கும் சைக்கிள் பயணம்!

பாரா ஸ்போர்ட்ஸை ஊக்குவிக்கும் வகையில் பாரா சைக்கிள் ஓட்டுநர்கள், எல்லை பாதுகாப்பு படை வீரர்களுடன் இணைந்து காஷ்மீரிலிருந்து கன்னியாகுமரிக்கு சைக்கிள் பயணத்தில் ஈடுபட்டுள்ளனர். இன்று (டிசம்பர் 30) தூத்துக்குடி வந்தடைந்த இவர்களை மாவட்ட காவல் கண்காணிப்பாளர் எஸ்.ஜெயக்குமார் வரவேற்றார்.

தூத்துக்குடி:இந்தியாவின் முதல் பாரா சைக்கிள் ஓட்டுநரும், லிம்கா புக் ஆஃப் ரெக்கார்ட்ஸ் உரிமையாளருமான ஆதித்யா மேத்தா பாரா ஸ்போர்ட்ஸை ஊக்குவிக்கும் வகையில் சைக்கிள் பயணத்தை ஏற்பாடு செய்தார்.

இவரது தலைமையில், நாட்டின் சிறந்த பாரா சைக்கிள் ஓட்டுநர்கள், எல்லை பாதுகாப்பு படை வீரர்களுடன் இணைந்து காஷ்மீரிலிருந்து கன்னியாகுமரிக்கு “இன்ஃபினிட்டி 2020”இன் ஒரு பகுதியாக சைக்கிள் பயணம் மேற்கொண்டு வருகின்றனர். இந்த சைக்கிள் பயணம், ஸ்ரீநகரின் தால் ஏரியில் இருந்து நவம்பர் 18ஆம் தேதி தொடங்கப்பட்டது.

எல்லை பாதுகாப்பு படையின் இயக்குநர் ஜெனரல் ஸ்ரீ ராகேஷ் அஸ்தானா இதனை கொடியசைத்து தொடங்கி வைத்தார். ஸ்ரீநகர், உதம்பூர், ஜம்மு, சண்டிகர், டெல்லி, நொய்டா, மதுரா, தோல்பூர், ஜான்சி, நாக்பூர், ஹைதராபாத், அனந்த்பூர், தருமபுரி, கரூர், மதுரை, கோவில்பட்டி, திருநெல்வேலி வழியாக சைக்கிள் பயணம் டிசம்பர் 31ஆம் தேதி 3842 கிலோமீட்டர் 35 பெருநகரங்களையும் கடினமான மற்றும் மலைப்பாங்கான நிலப்பரப்புகளையும் கடந்து கன்னியாகுமரியில் முடிவடைய உள்ளது.

இன்று காலை தூத்துக்குடி மாவட்டம் கோவில்பட்டி வந்தைடைந்த சைக்கிள் பயணத்தை தேசிய நெடுஞ்சாலையில் வில்லிசேரி சந்திப்பில் தூத்துக்குடி மாவட்ட காவல் கண்காணிப்பாளர் எஸ்.ஜெயக்குமார் வரவேற்று வாழ்த்து, தெரிவித்து வழியனுப்பிவைத்தார்.

தூத்துக்குடியில் வரவேற்பு

இது குறித்து சைக்கிள் பயணத்தை மேற்கொண்டு வரும் எல்லை பாதுகாப்பு படை வீரர் மாதவன், ’பாரா ஸ்போர்ட்ஸை ஊக்குவிக்கவும் நாட்டில் திறமையானவர்களை கண்டறிந்து அவர்களை வெளிக்கொண்டு வரவும் மாற்றுத்திறனாளிகளிடம் விழிப்புணர்வை ஏற்படுத்தவும் பாரா சைக்கிள் பயணத்தை மேற்கொண்டு வருகிறோம்’ என்றார்.

இதையும் படிங்க:ஊரடங்கிற்குப் பின்னர் ஒன்று சேர்ந்த சைக்கிள் விரும்பிகள்