'குடியுரிமை திருத்தச் சட்டத்துக்கு எதிராக தீர்மானம் நிறைவேற்ற வேண்டும்' - இயக்குநர் கௌதமன்

தூத்துக்குடி: குடியுரிமை திருத்தச் சட்டத்திற்கு எதிராக தமிழ்நாடு அரசு தீர்மானம் நிறைவேற்ற வேண்டும் என இயக்குநர் கௌதமன் தெரிவித்துள்ளார்.

தூத்துக்குடியில் சி.ஏ.ஏ, என்.ஆர்.சி மற்றும் என்.பி.ஆரை திரும்பப் பெற வலியுறுத்தி, குடியுரிமை திருத்தச் சட்ட எதிர்ப்பு மக்கள் இயக்கம் சார்பில் தொடர் முழக்க கண்டன ஆர்ப்பாட்டம் நடைபெற்றது. இன்று காலை முதல் மாலை வரை நடைபெற்ற ஆர்ப்பாட்டத்தில் ஆயிரக்கணக்கான இஸ்லாமியர்கள், சி.ஏ.ஏ. எதிர்ப்பு அமைப்புகள் மற்றும் ஜெகத்கஸ்பர், இயக்குநர் கௌதமன் உள்ளிட்டோர் பங்கேற்று தங்களது கண்டனங்களைப் பதிவிட்டனர்.

இதனைத் தொடர்ந்து செய்தியாளர்களிடம் பேசிய இயக்குநர் கெளதமன், ' நாடு முழுவதும் குடியுரிமை திருத்தச் சட்டத்துக்கு எதிராக நடைபெற்ற போராட்டத்தில் 78 இஸ்லாமியர்கள் மரணமடைந்துள்ளனர். 16 மாநிலங்கள் இந்தச் சட்டத்திற்கு எதிராகத் தீர்மானம் இயற்றியுள்ளது. பிகாரில் பாஜக கூட்டணியில் உள்ள அரசு குடியுரிமை திருத்தச் சட்டத்துக்கு எதிராகத் தீர்மானம் இயற்றி உள்ள நிலையில் அண்டை மாநிலங்களான புதுச்சேரி, கேரளாவும்கூட குடியுரிமை திருத்தச் சட்டத்திற்கு எதிராக சட்டப்பேரவையில் தீர்மானம் இயற்றியுள்ளன. ஆனால், தமிழ்நாடு அரசு தற்போதுவரை தீர்மானம் இயற்றவில்லை. எனவே உடனடியாக தமிழ்நாடு அரசு குடியுரிமை திருத்தச் சட்டத்தை எதிர்ப்பது என்று சட்டப்பேரவையில் தீர்மானம் இயற்ற வேண்டும்.

நாடு முழுவதும் ஆர்எஸ்எஸ் வன்முறையை கட்டவிழ்க்கப்பட்டால், இந்திய ஒன்றியத்துக்கான இறையாண்மை சீர்கெட்டுப் போகும்‌. தமிழ்நாடு அரசு குடியுரிமை திருத்தச் சட்டத்துக்கு எதிராகத் தீர்மானம் இயற்றினால் ஆட்சி கலைக்கப்படும் என்று ஹெச்.ராஜா கூறியிருப்பது தமிழ்நாட்டின் இறையாண்மைக்கு விடப்பட்ட சவால்‌‌. எனவே ஹெச்.ராஜாவை உடனடியாக கைது செய்ய வேண்டும். அவர் நாவடக்கத்துடன் பேச வேண்டும்' என்றார்.

தொடர்ந்து ஜெகத்கஸ்பர் கூறுகையில், ’இது குடியுரிமை திருத்தச் சட்டத்திற்கு எதிரானப் போராட்டம் மட்டுமல்ல. வெறும் 36 விழுக்காடு மக்களின் வாக்குகளை மட்டும் பெற்றுக்கொண்டு அதிகாரத்தின் அனைத்து வலிமைகளையும் வைத்துக்கொண்டு மக்களை அடக்க நினைப்பது பெரும் அச்சமாக உள்ளது. 70 தினங்களுக்கும் மேலாக நாடு முழுவதும் நடைபெறுகின்ற குடியுரிமை திருத்தச் சட்டத்திற்கு எதிரான போராட்டம் குறித்து தற்போதுவரை மத்திய அரசு மக்களிடையே இறங்கி, வந்து பேச்சுவார்த்தை நடத்தாதது பெரும் அச்சத்தை ஏற்படுத்தியுள்ளது.

இந்திய மக்கள் அனைவருக்கும் ஒட்டுமொத்தமாக உலை வைக்கக்கூடிய ஒரு அமைப்பைச் செயல்படுத்த முயற்சிக்கிறது. இந்த அரசு மக்களின் மரணத்திலிருந்து மகிழ்கிறது. இத்தகைய செயல் மானுட பண்பை மறந்து மனிதத்தை சீர் குலைப்பதாக அமைகிறது. எனவே இந்த அரசை, இந்தச் சட்டத்தை எதிர்ப்பது மட்டுமல்லாமல் இந்த பாசிச போக்கையும் நாங்கள் எதிர்க்கிறோம்' என்றார்.