கரோனா பாதித்த குழந்தைகளைப் பாதுகாக்க மாவட்ட ஆட்சியர் தலைமையில் குழு: அமைச்சர் பி.கீதாஜீவன்

தூத்துக்குடி: கரோனா தொற்றால் பாதிப்புக்குள்ளாகும் குழந்தைகளைப் பாதுகாக்க மாவட்ட ஆட்சியர் தலைமையில் குழு அமைக்கப்படும் என சமூக நலன், மகளிர் உரிமைத் துறை அமைச்சர் பி.கீதா ஜீவன் தெரிவித்துள்ளார்.

தமிழ்நாட்டில் கரோனா தொற்றின் இரண்டாவது அலை வேகமாகப் பரவி வருகிறது. இதனைத் தடுக்க அரசு பல்வேறு நடவடிக்கைகளை எடுத்து வருகிறது.

தூத்துக்குடி மாநகராட்சி பகுதியில் உள்ள 60 வார்டுகளில் கிருமி நாசினி தெளிப்பதற்காக சிறப்பு நடவடிக்கை மேற்கொள்ளப்பட்டது. கிருமி நாசினி தெளிக்கும் ராட்சத வாகனங்களின் செயல்பாட்டை மாநகராட்சி அலுவலகத்தில் இருந்து நாடாளுமன்ற உறுப்பினர் கனிமொழி தலைமையில் சமூக நலன், மகளிர் உரிமைத் துறை அமைச்சர் பி.கீதா ஜீவன் தொடங்கி வைத்தார். இந்நிகழ்ச்சியில் மாவட்ட ஆட்சியர் செந்தில்ராஜ், மாநகராட்சி ஆணையர் சரண்யா உள்ளிட்டோர் கலந்து கொண்டனர்.

பின்னர் செய்தியாளர்களிடம் அவர் பேசுகையில், "இந்த வாகனம் தொடர்ந்து அனைத்துப் பகுதிகளுக்கும் அனுப்பப்பட்டு கிருமி நாசினி தெளிக்கப்படும். கரோனா பரவலைத் தடுப்பதற்காக அனைவரும் தடுப்பூசி செலுத்திக் கொள்ள வேண்டும்.

பொதுமக்களிடம் தடுப்பூசி போட்டுக் கொள்வதன் அவசியம் குறித்து விழிப்புணர்வு தொடர்ந்து ஏற்படுத்தப்படும். மாநகராட்சிப் பகுதியில் புகை செலுத்தி கொசுக்களை ஒழிப்பதற்கான நடவடிக்கை தொடங்கப்பட்டுள்ளது.

தூத்துக்குடி மாவட்டத்தில், கரோனா தொற்றால் பாதிக்கப்பட்டவர்களுக்கு சிகிச்சை அளிப்பதற்காக கூடுதலாக 400 படுக்கைகள் அமைக்கப்பட்டுள்ளன. மாவட்டத்தில் அரசு மருத்துமனை மட்டுமின்றி, தனியார் மருத்துவமனைகளிலும் சிகிச்சை பெறுபவர்களுக்குத் தேவையான ஆக்ஸிஜன் கிடைக்க நடவடிக்கை மேற்கொள்ளப்பட்டுள்ளது.

கரோனா தொற்றால் பாதிக்கப்படக்கூடிய குழந்தைகளைப் பாதுகாப்பதற்காக ஒவ்வொரு மாவட்டத்திலும் மாவட்ட ஆட்சியர் தலைமையில் குழு விரைவில் அமைக்கப்படும். இந்தக் குழு குழந்தைகளின் நிலையை கண்டறிந்து 24 மணி நேரத்திற்குள் அவர்களுக்குத் தேவையான பாதுகாப்பை வழங்கும்.

குழந்தைகளுக்கு என 'கோவிட் கேர் சென்டர்' அமைக்கப்படும். தொற்று பாதிப்பால் பெற்றோர்களை இழந்த குழந்தைகளை, அரசு இல்லங்களில் சேர்த்து பராமரிக்க நடவடிக்கை மேற்கொள்ளப்படும்" என்றார்.

இதையும் படிங்க: 'ஒரு தொகுதிக்கு 200 படுக்கையைத் தயார் செய்ய நடவடிக்கை' அமைச்சர் சேகர் பாபு!