தூத்துக்குடியில் லாரி உரிமையாளர்கள் சம்மேளன நிர்வாகிகள் செய்தியாளர்களைச் சந்தித்து பேட்டியளித்தனர். அப்போது லாரி உரிமையாளர்கள் சங்க நிர்வாகி ஜெயசீலன் கூறுகையில், ”தூத்துக்குடி துறைமுகத்தை மையமாகக் கொண்டு 2000 முதல் 3000 லாரிகள் வரை சரக்கு ஏற்றி இறக்கும் தொழிலுக்காக இயங்கிவருகிறது. தற்போது மத்திய அரசு லாரிகளில் அதிக சுமை ஏற்றினால் விதிக்கும் அபராதத் தொகையை அதிகரித்துள்ளது” என்றார்.
லாரிகளுக்கு அபராதத் தொகையை உயர்த்தியுள்ளதன் மூலம் விபத்துகள் குறையும் எனக் கூறி வருகின்றனர்.
ஆனால் லாரிகளில் ஏற்றப்படும் அதிகப்படியான சுமை என்பது மத்திய அரசு கட்டுப்பாட்டில் உள்ள துறைமுகத்தில் இருந்து தான் எடுத்துச்செல்லப்படுகிறது என்றும் ஜெயசீலன் கூறினார்.
அதிகச் சுமை ஏற்றப்பட்ட லாரிகளை கண்டுகொள்ளாமல் விடுவதற்கு அதிகாரிகள் லஞ்சம் பெறுகின்றனர் என்று கூறிய ஜெயசீலன், தமிழ்நாடு முழுவதும் இந்த லஞ்ச நடவடிக்கை தொடர்ந்து நடைபெறுகிறதாகவும் மதுரையில் இதற்காக குழு ஒன்று செயல்படுகிறது என்றும் கூறினார்.
லாரி உரிமையாளர் சங்க நிர்வாகி ஜெயசீலன் இந்த நிலைமை தொடர்ந்து நீடித்தால் லாரி உரிமையாளர்களின் தொழில் நலிவடைந்து, அவர்களின் கடனை கட்ட முடியாத சூழ்நிலை ஏற்படும் என்று பேசிய ஜெயசீலன், உடனடியாக துறைமுக நிர்வாகம் இதில் தலையிட்டு லாரியின் கொள்ளளவுக்கு ஏற்றவாறு சரக்குகளை ஏற்றி அனுப்ப நடவடிக்கை எடுக்க வேண்டும் என்று கூறினார். அவ்வாறு நடவடிக்கை எடுக்கப்படாவிட்டால் தமிழ்நாடு முழுவதும் லாரி உரிமையாளர்கள் சம்மேளனம் சார்பில் போராட்டம் நடைபெறும் என தெரிவித்தார்.
இதையும் படிங்க: புத்துணர்ச்சியை தரும் மேஜிக்...சர்வதேச காபி தினம்!
