நாட்டின் 73ஆவது சுதந்திர தினம் நாளை கொண்டாடப்படுவதையொட்டி தேசத் தலைவர்களான மகாத்மா காந்தி, ஜவஹர்லால் நேரு, வ.உ.சிதம்பரனார் போன்றவர்கள் சுதந்திரத்தில் ஆற்றிய பங்கு குறித்து விழிப்புணர்வு ஏற்படுத்தும் வகையில் அந்தந்த தலைவர்களின் முகமூடிகளை அணிந்தவாறு தூத்துக்குடி கால்டுவெல் பள்ளி மாணவர்கள் சார்பில் விழிப்புணர்வு பேரணி நடைபெற்றது. இந்தப் பேரணியை மாவட்ட ஆட்சித் தலைவர் சந்தீப் நந்தூரி கொடியசைத்து தொடங்கி வைத்தார்.
நீர் சேமிப்பு குறித்து விழிப்புணர்வு ஏற்படுத்தப்படும்' பின்னர் செய்தியாளர்களிடம் பேசிய அவர், “சுதந்திர தினத்தை முன்னிட்டு தூத்துக்குடி மாவட்டத்தில் உள்ள அனைத்து கிராம ஊராட்சிகளிலும் மரம் வளர்க்க திட்டமிடப்பட்டுள்ளது. சுமார் இரண்டு லட்சம் மரங்கள் நடப்பட உள்ளது. தூத்துக்குடி மாவட்டத்தில் உள்ள 500 குளங்கள் தூர்வாரப்பட உள்ளது. குளங்களை தூர்வார்வதற்காகவும், நீர்நிலைகளை பாதுகாப்பதற்காகவும் மழைநீர் சேகரிப்பு குறித்த விழிப்புணர்வு ஏற்படுத்தும் வகையிலும் கிராமசபைக் கூட்டத்தில் பல்வேறு விழிப்புணர்வு நிகழ்ச்சிகள் நடத்த திட்டமிடப்பட்டுள்ளது" என்றார்.
