குலசேகரப்பட்டினத்தில் ராக்கெட் ஏவுதளம் பணிகள் ஓராண்டுக்குள் நிறைவடையும் - இஸ்ரோ முன்னாள் தலைவர் சிவன்

Rocket launch pad: குலசேகரப்பட்டினத்தில் ராக்கெட் ஏவுதளம் அமைப்பதற்கான கட்டுமானப் பணிகள் இன்னும் ஓராண்டுக்குள் முடிவடையும் என இந்திய விண்வெளி ஆய்வு மைய முன்னாள் தலைவர் சிவன் கூறியுள்ளார்.

தூத்துக்குடி:தூத்துக்குடியில் உள்ள ஏபிசி மகாலட்சுமி மகளிர் கல்லூரியின் 50வது பொன்விழா ஆண்டை முன்னிட்டு, 2023-2024ஆம் ஆண்டில் ஏபிசி மகாலட்சுமி மகளிர் கல்லூரி மற்றும் வஉசி கல்லூரியில் பல்வேறு நிகழ்ச்சிகள் நடைபெற உள்ளது.

வஉசி கல்லுரியில் பொன் விழா ஆண்டு நிகழ்ச்சிகான தொடக்க விழா நடைபெற்றது. இவ்விழாவில், இந்திய விண்வெளி ஆய்வு மையத்தின் முன்னாள் தலைவர் சிவன் கலந்து கொண்டு நிகழ்ச்சியை சிறப்பித்தார். பின்னர், செய்தியாளர்களைச் சந்தித்த சிவன் கூறுகையில், ‘இந்திய விண்வெளி ஆய்வு மையமானது சந்திராயன் 3 வெற்றிகரமாக செலுத்தியதை தொடர்ந்து, ஆதித்யா எல் 1 திட்டமும் வெற்றிகரமாக செயல்பாட்டில் உள்ளது.

அதன்பின், ககன்யான் திட்டத்தை செயல்படுத்துவதற்கான பணிகளை முனைப்பு காட்டி வருகிறது. ராக்கெட்டுகளை விண்ணிற்கு செலுத்தும் திட்டத்தில் இந்திய விண்வெளி ஆய்வு மையம் மட்டுமல்ல, பல தனியார் நிறுவனங்களும் ஈடுபட உள்ளன. இதற்காக அரசு பல செயல் திட்டங்களை வகுத்து வருகிறது. தனியார் நிறுவனங்கள் செயற்கைக்கோள்களை செலுத்தும்போது அவர்களை கட்டுப்படுத்துவதற்காக அரசு ‘இன்ஸ்பேஸ்’ என்ற ஒரு திட்டத்தையும் வடிவமைத்துள்ளது.

அதன் மூலமாக, செயற்கைக்கோள் செலுத்தக்கூடிய நிறுவனத்தின் நோக்கம் என்ன என்பது போன்ற விபரங்களை தெரிந்து கொண்டு, அதன் மூலமாகவே அவர்களுக்கு உரிய அனுமதி அளிக்கப்படும். இதுவரை 140க்கும் மேற்பட்ட தனியார் நிறுவனங்கள் செயற்கைக்கோள் செலுத்துவதற்கு விருப்பங்களை தெரிவித்துள்ளது.

மேலும், குலசேகரபட்டினத்தில் ராக்கெட் ஏவுதளம் அமைப்பதற்கு தேவையான 2,400 ஏக்கரில் 2,000 ஏக்கர் நிலம் கையகப்படுத்தப்பட்டுள்ளது. மீதமுள்ள 400 ஏக்கர் நிலம் இந்த ஆண்டு இறுதிக்குள் கையகப்படுத்தப்படும் என தமிழக அரசு தெரிவித்துள்ளது. அதனைத் தொடர்ந்து, காம்பவுண்ட் சுவர் கட்டுமானப் கட்டிடப் பணிகள் தொடங்கப்பட்டு, அவை ஓராண்டுக்குள் முடிவடைந்து அதன் பின் ராக்கெட் விண்ணில் ஏவப்படும் என்றார்.

குலசேகரப்பட்டினத்தில் கட்டுமானப் பணிகளுக்கான திட்ட மதிப்பீடு 600 முதல் 700 கோடி ரூபாய் வரை இருக்கும் என்றாலும்,, ராக்கெட் ஏவுதல் மூலமாக பொருளாதாரத்தில் மிகப்பெரிய மாற்றம் ஏற்பட்டு, அதிக அளவில் வேலை வாய்ப்பு உருவாகும். இந்த ராக்கெட் ஏவுதளத்திற்கு தேவையான உதிரி பாகங்கள் தயாரிக்கக் கூடிய பல தொழில் நிறுவனங்கள் வருவதற்கான வாய்ப்பும் உள்ளது.

இந்திய அரசு “ஸ்டார்ட் ஆப் இந்தியா” ஆகியவற்றின் மூலமாகவும், செமி கண்டக்டர் உற்பத்தி மேம்படுவதற்கான பணிகளையும் மேற்கொள்ளத் தொடங்கியுள்ளதாக கூறினார். குலசேகரபட்டினத்தில் ராக்கெட் தளம் அமைக்கப்படும் பட்சத்தில் அங்குள்ள பொதுமக்களுக்கும் பாதுகாப்பு அதிகரிக்கப்படும். ஆகவே யாரும் அச்சம் அடையத் தேவையில்லை" என்றார்.

இதையும் படிங்க:ஆடல் பாடலுடன் பாடம் நடத்தும் பாக்கியா டீச்சர்.. ஆர்வத்துடன் கற்கும் மாணவர்கள்!