தூத்துக்குடியில் 102 கிலோ தங்கம் பறிமுதல்...!

தூத்துக்குடி: 102 கிலோ தங்கம் பறிமுதல் செய்யப்பட்ட சம்பவம் தூத்துக்குடியில் பெரும் பரபரப்பை ஏற்படுத்தியுள்ளது.

நாடு முழுவதும் ஏழு கட்டங்களாக நடைபெறவிருக்கும் மக்களவைத் தேர்தல் தமிழ்நாட்டில் ஏப்ரல் 18 ஆம் தேதி நடைபெறுகிறது. இதனை முன்னிட்டு, வாக்காளர்களுக்கு பணம், இலவச பொருட்கள் விநியோகிக்கப்படுவதைத் தவிர்ப்பதற்காக தேர்தல் பறக்கும் படை அலுவலர்கள் அதிரடி வாகன சோதனையில் ஈடுபட்டுவருகின்றனர்.

இந்நிலையில் தூத்துக்குடியில் இன்று மதியம் தேர்தல் பறக்கும் படை அலுவலர்கள் நகைக் கடை அருகே தணிக்கையில் ஈடுபட்டிருந்தனர்.

அப்போது அவ்வழியாக சந்தேகப்படும் படியாக வந்த டெம்போ ட்ராவலர் ஒன்றினை தடுத்து நிறுத்தி சோதனை நடத்தினர்.

அதில் உரிய ஆவணங்கள் இன்றி 102 கிலோ தங்கம் மற்றும் வெள்ளி எடுத்துவரப்பட்டது கண்டுபிடிக்கப்பட்டது.

இதனைத்தொடர்ந்து மேற்கொண்ட விசாரணையில் கோயம்புத்தூரைச் சேர்ந்த ஹரிஹரன் எனும் தங்க வியாபாரி தென் மாவட்டங்களில் தங்க நகைகளை விற்பனை செய்யும் பொருட்டு தங்கம் எடுத்து வந்ததாக கூறினார்.

ஆனால் அவரிடம் தங்கம் எடுத்து வந்து அதற்கான முறையான ஆவணங்கள் இல்லை. எனவே தேர்தல் பறக்கும் படை அலுவலர்கள் தங்கத்தை பறிமுதல் செய்து மாவட்ட ஆட்சியரும், தேர்தல் அலுவலருமான சந்தீப் நந்தூரி ஒப்படைத்தனர்.