Annamalai Vs Udhayanidhi: வடக்கே ராகுல் காந்தி, தெற்கே உதயநிதி ஸ்டாலின் - அண்ணாமலை விமர்சனம்..

தென்காசியில் இருந்து இரண்டாம் கட்டமாக தனது நடைபயண யாத்திரையை மேற்கொள்ள இருக்கும் அண்ணாமலை அதற்காக தூத்துக்குடி விமான நிலையம் வந்ததைத் தொடர்ந்து, செய்தியாளர்களை சந்தித்த அவர் தமிழகத்தில் திமுக ஆட்சி குறித்தும் உதயநிதி ஸ்டாலின் குறித்தும் விமர்சித்துள்ளார்.

தூத்துக்குடி: என் மண் என் மக்கள் நடைபயண யாத்திரையை பாஜக தலைவர் அண்ணாமலை இரண்டாம் கட்டமாக இன்று (செப்.4) தென்காசியில் இருந்து மேற்கொள்ள இருக்கிறார். இதற்காக சென்னையில் இருந்து விமானம் மூலம் தூத்துக்குடி வாகை குளம் வருகை தந்த அவர், விமான நிலையத்தில் செய்தியாளர்களை சந்தித்தார்.

அப்போது அவர் கூறுகையில், “கடந்த சில நாட்களுக்கு முன்னர் நெல்லையில் இளைஞரணி செயலாளராக இருந்த ஜெகன் வெட்டி படுகொலை செய்யயப்பட்டார். அதைத் தொடர்ந்து, நேற்று இரவு (செப்.3) திருப்பூரில் உள்ள பல்லடத்தில் பாஜகவை சேர்ந்த மோகன் ராஜா என்ற கிளை தலைவர் அவரது தம்பி, அம்மா, சித்தி ஆகிய 4 பேரும் கூலிப் படையினரால் வெட்டி கொலை செய்யப்பட்டுள்ளனர்.

தமிழ்நாடு எங்கே போகின்றது. கொங்கு வரலாற்றில் இதைப் போன்ற அருவாள் வெட்டு சம்பவத்தை யாரும் பார்த்தது கிடையாது. தமிழகம் முழுவதும் குடிகார நாடாக மாறி இருக்கிறது. இது வெட்கி தலை குனிய வேண்டிய சம்பவம். தமிழகம் வன்முறை கலாச்சார மாநிலமாக மாறி இருக்கிறது. இதற்கு அடிப்படை குடி, இதனால் தான் எல்லோரும் அருவாளை தூக்கி இருக்கிறார்கள். இதனை மாநில அரசு நிச்சயம் கவனத்தில் கொண்டுவர வேண்டும்.

இனியாவது திமுக தன்னுடைய நிலையை மாற்றிக் கொண்டு, குடியில் இருந்து விடுதலைக் கொடுக்க வேண்டும்.
கடந்த தினத்தில் சபாநாயகர் முன்பு ஒரு பெண் கந்து வட்டி கொடுமையால் தீக்குளிப்பதற்கு முயற்சி எடுத்து இருக்கின்றார். இதையெல்லாம் தமிழகத்தில் பேச வேண்டி உள்ளது. தமிழகத்தில் வன்முறை, குடி, அருவாள் கலாச்சாரம் என நிறைய பிரச்னை இருக்கிறது.

முதலில் தமிழ்நாட்டைப் பற்றி பேச வேண்டும். தமிழ்நாட்டு பிரச்னையை வைத்து ஓட்டு கேட்டால், 2024 தேர்தலில் ஒரு ஓட்டு கூட மக்கள் போட மாட்டார்கள் என்று தெரிந்து கொண்டிருக்கின்றார் தமிழக முதலமைச்சர். ஒரு முதலமைச்சர் ஆட்சிக்கு வந்து முப்பது மாதங்களாகியும், செய்த சாதனை பற்றி பேசாமல் கூட்டணி பற்றி பேசுகின்றேன் என்று கிளம்பி இருக்கின்றார்.

முதல்வருக்கு இப்போதே தெரிந்திருக்கும், 2024 தேர்தலில் தமிழகம் பற்றி பேசினால் திமுக வாஸ் அவுட் ஆகிவிடும் என்று. அதனால் தான் அவர் இந்தியாவைப் பற்றி பேசுகின்றார். முதலமைச்சர் இந்தியா பற்றி பேசுவதற்கு முன் தமிழ்நாட்டைப் பற்றி பேச வேண்டும். இந்தியா பற்றி பேச 140 கோடி மக்கள் இருக்கின்றனர். தமிழ்நாட்டில் லஞ்சம் என்பது தலைவிரித்து ஆடுகிறது. எனவே அதை பற்றித் தான் பேச வேண்டும்.

ராகுல் காந்தி, தொடர்ந்து மோடி சமுதாயத்தை இழிவுப்படுத்தி விட்டு நான் அப்படி சொல்லல, இப்படி சொல்லல என மழுப்புகிறார். சுப்ரீம் கோர்ட் ராகுல் காந்தியை நிரபராதி இல்லை என்றும் ஆனால் அவரை பதவி நீக்கம் செய்தால் மீண்டும் ஒரு தேர்தலைக் கொண்டு வந்து, வாக்காளர்களுக்கு தொந்தரவு கொடுக்க உச்ச நீதிமன்றம் விரும்பவில்லை அதற்காக அந்த பதவியை திரும்பக் கொடுக்கிறோம் என்று சொன்னார்கள்.

மேலும் வட இந்தியாவிற்கு சீனியர், ராகுல் காந்தி என்றால் தென் தமிழகத்திற்கு ஜூனியர் உதயநிதி. இவர்கள் எல்லாம் அப்பா, அம்மா, தாத்தா, பாட்டி கஷ்டப்பட்டு உழைச்சு வச்சா, அத வச்சு நோகாம அரசியலுக்கு வந்து விடுகிறார்கள். அதனால் தான் எது தப்பு, எது சரி என்பது தெரியவில்லை. சனாதன தர்மம் என்றால் இந்துத்துவா என்று புதிய விளக்கம் அளிக்கிறார்.

மேலும், தமிழ்நாட்டில் சனாதன தர்மம் வேறு, இந்தியாவில் சனாதன தர்மம் வேறு அதை நீங்கள் வேறு வகையில் புரிந்து கொள்ள வேண்டும் என்று கூறுகிறார். இதெல்லாம் முதன்முதலாக இந்தியாவில் சனாதன தர்மத்திற்கு 2,000 ஆண்டுகள் யாரும் கொடுக்காத ஒரு விளக்கத்தை திமுகவைச் சேர்ந்த உதயநிதி கொடுத்திருக்கிறார். தன்னுடைய தவறை ஒத்துக்கொண்டு மன்னிப்பு கேட்காதவன் ஒரு மனிதனே இல்லை. அதற்கு பின் தான் அரசியல்வாதி, அதன் பின் தான் மக்களை ஆளக்கூடியவர். 2024ல் இந்திய கூட்டணி மண்ணை கவ்வப்போவது உறுதி.

மோடி கூட்டணி 2024ல் 317 சீட் வரும் என இந்தியா டுடே கருத்துக்கணிப்பு கூறியது. ஆனால் தேர்தல் வந்த பின்பு, மோடி பிரச்சாரத்திற்கு வரும் போது 400 சீட்டை தாண்டி போகப் போகின்றது. வரலாறு காணாத தோல்வியை இ.ந்.தி.யா கூட்டணி சந்திக்கப் போகின்றனர்.

திமுகவினர் தற்போது சமூக நீதி, ஜாதி, சனாதன தர்மம் பேசுகின்றீர்களே! இத்தனை வருடமாக கட்சியை சும்மா நடத்தினீர்களா?. நேரு பேசும் போது, தம்பிகளா நீங்கள் தான் எங்களைக் காப்பாற்ற வேண்டும், வழக்கறிஞர் படிக்க வேண்டும் என்கிறார். அப்படி என்றால், குற்றம் உள்ள நெஞ்சு தானே குறுகுருக்கின்றது” எனக் கூறினார்.

அதைத் தொடர்ந்து சீமான் பற்றி பேசும் போது, “ஒரு பெண் ஒரு வழக்கு கொடுத்ததுக்கு பின் சீமான் பயந்துவிட்டார் என்பதை இப்போதுதான் பார்க்கின்றேன். அவரிடம் எனக்கு பிடித்ததே அவருடைய தைரியம் தான். ஒரு கம்ப்ளைன்ட்-க்கு பயந்து நாங்களும் திராவிட கட்சிகளும் பங்காளி என்கிறார். போனவாரம் வரைக்கும் வேற ஒரு சீமான் இப்போது 2.0 சீமான்.

ராமநாதபுரத்தில் திமுக நிற்கவில்லை என்றால் இவர் நிற்பாராம். இதற்கு இவர் நாம் தமிழர் கட்சி திமுகவின் பி கட்சி என்று சொல்லிக் கொள்ள வேண்டியது தானே. ஒரு மனிதனை ஒரு கம்ப்ளைன்ட் எந்த அளவுக்கு மாற்றி இருக்கிறது என்று பாருங்கள். சீமான் இந்த அளவுக்கு பேசுவார் என்று நான் எதிர்பார்க்கவில்லை.

அவர் நேற்று பேசியது, அவர் மீது வைத்திருக்கின்ற மரியாதையை பெருமளவு குறைந்திருக்கிறது. தைரியமாக பேசக்கூடியவர் என்று நினைத்தேன், ஆனால் ஒரு கம்ப்ளைன்ட்டால் சீமான் திமுகவைச் சார்ந்து பேசுவார் என்றும் திமுகவை பங்காளி என்று கூறுவார் என்றும் நினைத்துப் பார்க்கவில்லை.

தென் தமிழகத்தில் ஒரு டெவலப்மெண்ட் இல்லை. தென் தமிழகத்தினுடைய வளர்ச்சி மிக முக்கியம் என்று நினைக்கக்கூடிய முதன்மையானவன் நான் (அண்ணாமலை). சென்னையில் இருக்கின்ற அரசியல்வாதிகளுக்கு தென் தமிழகம் மீது அக்கறை இல்லை என்ற குற்றச்சாட்டை வைக்கின்றேன்.

பள்ளிக்குள் ஜாதி கயறு கட்டுகின்றனர். ஒவ்வொரு ஜாதிக்கு ஒவ்வொரு வகையான கையறு இருக்கிறது. இப்படி எல்லாம் ஒரு கலாச்சாரத்தை கொண்டு வந்து பள்ளிக்குள் ஜாதியை விதைத்தால் எப்படி பள்ளியில் ஜாதி பேசாமல் இருப்பார்கள். இதற்கு ஒரு புது பிளான் வேணும். அதற்கு பாஜக ஆட்சிக்கு வரவேண்டும்” என்றார்.

இதையும் படிங்க:"உதயநிதி ஸ்டாலினின் சனாதன பேச்சு திமுக அழிய போகிறது என்பதை காட்டுகிறது" -ஆளுநர் சி.பி.ராதாகிருஷ்ணன் ஆவேசம்!