ஸ்டெர்லைட் துப்பாக்கிச் சூடு: ரஜினிகாந்த் சார்பாக வழக்கறிஞர் ஆஜர்!

தூத்துக்குடி: ஸ்டெர்லைட் துப்பாக்கிச் சூடு சம்பவம் தொடர்பாக, ஒருநபர் ஆணையத்தில் ரஜினிகாந்த் சார்பாக அவரது வழக்கறிஞர் ஆஜராகி விளக்கமளிப்பார் என தகவல் வெளியாகியுள்ளது.

தூத்துக்குடி ஸ்டெர்லைட் துப்பாக்கிச் சூடு தொடர்பாக ஓய்வுபெற்ற நீதிபதி அருணா ஜெகதீசன் தலைமையில் ஒருநபர் ஆணையத்தில் விசாரணை நடைபெற்று வருகிறது. ஒரு நபர் ஆணையத்தின் 24ஆவது கட்ட விசாரணை இன்று(ஜன-18) தொடங்கி வரும் 22ஆம் தேதி வரை நடைபெறுகிறது. இந்த 5 நாள் விசாரணையில் 56 பேருக்கு சம்மன் அனுப்பப்பட்டுள்ளது.

இந்நிலையில், நாளை (19-01-21) நடைபெறும் விசாரணையில் துப்பாக்கிச் சூடு தொடர்பாக விளக்கமளிக்க நடிகர் ரஜினிகாந்துக்கு சம்மன் அனுப்பப்பட்டிருந்தது. ஆனால், உடல்நிலை காரணமாக ரஜினிகாந்த் சார்பாக அவரது வழக்கறிஞர் இளம்பாரதி ஆஜராகி விளக்கமளிப்பார் என தகவல் வெளியாகியுள்ளது.