மெர்க்கன்டைல் வங்கி செயல்பட எவ்வித சிக்கலும் இல்லை: தேசியப் பங்குச் சந்தைக்கு நிர்வாகம் கடிதம்!

தமிழ்நாடு மெர்க்கன்டைல் வங்கி வழக்கம்போல் செயல்படும் என்றும்; எவ்வித சிக்கலும் இல்லை எனவும் தேசியப் பங்குச் சந்தைக்கு நிர்வாகம் கடிதம் அனுப்பியுள்ளது.

தூத்துக்குடி:1921ஆம் ஆண்டு துவங்கப்பட்ட தமிழ்நாடு மெர்க்கன்டைல் வங்கி, தற்போது இந்தியா முழுவதும் 500-க்கும் மேற்பட்ட கிளைகளுடன் செயல்பட்டு வருகிறது. இந்நிலையில் கடந்த 5 ஆண்டுகளில் சமர்ப்பிக்கப்பட்ட அறிக்கையை ஆய்வு செய்த போது பல குறைபாடுகள் உள்ளதாகவும், முறையான கணக்கு காட்டப்படவில்லை எனவும் தெரிய வந்தது.

அதைத் தொடர்ந்து, தூத்துக்குடியில் உள்ள தமிழ்நாடு மெர்க்கன்டைல் வங்கியின் தலைமை அலுவலகத்தில் சில நாட்களுக்கு முன்பு வருமான வரித்துறை திடீர் சோதனை நடத்தினர். ஒரு நாள் முழுவதும் நடத்தப்பட்ட அந்தச் சோதனையில் கணக்கில் வராத பல கோடி ரூபாய் பணம் முறைகேடு செய்ததாக செய்திகள் வெளியாகின.

இந்நிலையில், இந்திய தேசியப் பங்குச் சந்தைக்கு, தமிழ்நாடு மெர்க்கன்டைல் வங்கி விளக்கத்துடன் கடிதம் அனுப்பி உள்ளது. அக்கடிதத்தில் கூறியிருப்பதாவது, "செபியின் (SEBI) 30ஆவது விதியின் கீழ் அறிவிப்பு (பட்டியல் கடமைகள் மற்றும் வெளிப்படுத்தல் தேவைகள்) ஒழுங்கு முறைகள், 2015 – புதுப்பிப்பு, வருமான வரிச் சட்டம் 1961 பிரிவு, 285 பிஏ-வின் கீழ், வருமான வரி அதிகாரிகள் கடந்த ஜூன் 27ஆம் தேதி அன்று, வங்கி சார்பில் குறிப்பிட்ட இடைவெளியில் வங்கி தாக்கல் செய்யும் எஸ்எப்டி எனும் குறிப்பிட்ட நிதி பரிவர்த்தனைகள் அறிக்கை தொடர்பாக கள ஆய்வில் ஈடுபட்டனர்.

அந்த ஆய்வின் போது எஸ்எப்டி, கணக்குகள் தாக்கல் செய்யாதது மற்றும் சில தவறுகள் மற்றும் குறைபாடுகள் இருப்பதும், சில எஸ்எப்டி அறிக்கைகளில் கண்டுபிடிக்கப்பட்டது. தாக்கல் செய்ய வேண்டிய கணக்குகள் தாக்கல் செய்தது மட்டுமின்றி, சுட்டி காட்டப்பட்ட தவறுகள் சரி செய்யும் நடவடிக்கைகள் மேற்கொள்ளப்பட்டு வருகின்றன.

வருமான வரி ஆணையம் மற்றும் பிற சட்டப்பூர்வ அதிகாரிகளிடம், வங்கி தாக்கல் செய்த நிதிநிலை அறிக்கைகளில், இது எந்த தாக்கத்தையும் ஏற்படுத்தாது என தெளிவுபடுத்த விரும்புகிறோம். இதனால், வங்கியில் எந்த விதமான நிதி தாக்கமும் ஏற்படாது. ஒரு சட்டத்தை மதிக்கும் அமைப்பாக, வருமான வரித்துறைக்குத் தேவையான அனைத்து விவரங்களையும் நாங்கள் வழங்குகிறோம்.

வங்கியின் வணிக செயல்பாடுகள் வழக்கம்போல் தொடர்கின்றன. இந்த விஷயம் காரணமாக எந்தப் பாதிப்பும் ஏற்படவில்லை. எங்கள் சட்டப்பூர்வக் கடமைகளை அவ்வப்போது வெளிபடுத்துவதற்கு நாங்கள் கடமைப்பட்டுள்ளோம்" என்று அந்தக் கடிதத்தில் தெரிவிக்கப்பட்டுள்ளது.