தூத்துக்குடி மாவட்டம் கோவில்பட்டி ஸ்ரீநிவாசநகர் பழைய ஆர்.டி.ஓ ஆபிஸ் தெரு பகுதியைச் சேர்ந்தவர் சின்னம்மாள் (65). இவர், ஜன.30ஆம் தேதி தனது வீட்டில் தனியாக இருந்தபோது அங்குவந்த அடையாளம் தெரியாத நபர் ஒருவர் சின்னம்மாளின் கழுத்திலிருந்த 5 சவரன் நகையை பறித்து விட்டுச் சென்றார்.
இது குறித்து சின்னம்மாள், கோவில்பட்டி மேற்கு காவல் நிலையத்தில் புகார் அளித்தார். அந்தப் புகாரின் பேரில் வழக்குப்பதிவு செய்த காவல் துறையினர் விசாரணை நடத்தி வந்தனர். முதற்கட்டமாக அப்பகுதியிலுள்ள கண்காணிப்புக் கேமராக்களை ஆய்வு செய்ததில் அதேபகுதியைச் சேர்ந்த சஞ்சீவ் நாதன் (39) என்பவர் மூதாட்டியிடம் செயின் பறிப்பில் ஈடுபட்டது தெரியவந்தது.