வீட்டு வாசலில் தூங்கிய விவசாயிக்கு நேர்ந்த கொடூரம்!

திருவாரூர்: மன்னார்குடி அருகே வீட்டு வாசலில் தூங்கிக் கொண்டிருந்தவர் மீது இருசக்கர வாகனம் ஏறி சம்பவ இடத்திலேயே உயிரிழந்தார்.

திருவாரூர் மாவட்டம் மன்னார்குடி அருகே பாமனி செருமாங்குலம் கிராமத்தைச் சேர்ந்த விவசாயி ஆனந்த். அவர் தனது வீடு வாசலில் தூங்கிக் கொண்டிருந்தார்.

அப்போது ராயபுரத்தைச் சேர்ந்த ஸ்டாலின் என்பவர் கர்ணாவூரைச் சேர்ந்த வீரகுமார் என்பவருடன், மன்னார்குடியிலிருந்து இருசக்கர வாகனத்தில் ராயபுரம் நோக்கி வந்துள்ளார். இருசக்கர வாகனம் பாமனிசெருமங்கலம் என்னும் பகுதியில் வந்தபோது எதிர்பாராதவிதமாக வீடு வாசலில் தூங்கிக் கொண்டிருந்த ஆனந்த் என்பவர் மீது மோதி விபத்துக்குள்ளானது.

இதில் ஆனந்த் சம்பவ இடத்திலேயே பரிதாபமாக உயிரிழந்தார். பின்னர் தகவலறிந்த காவல் துறையினர் சம்பவ இடத்திற்கு விரைந்துவந்து இறந்தவரின் உடலைக் கைப்பற்றி உடற்கூறாய்வுக்காக அரசு மருத்துவமனைக்கு அனுப்பிவைத்தனர்.

அதனைத்தொடர்ந்து இருசக்கர வாகனத்தில் வந்த ஸ்டாலின், வீரகுமார் இருவரிடமும் விபத்துக்கான காரணம் குறித்து வழக்குப்பதிவு செய்து விசாரணை நடத்திவருகின்றனர்.

இதையும் படிங்க:மதுபோதையில் காரை ஓட்டிச் சென்றதால் விபத்து: 4 பேர் படுகாயம்