பைக் மீது லாரி மோதி விபத்து: மனைவி கண் முன்னே கணவர் உயிரிழப்பு!

திருவாரூர்: நன்னிலம் அருகே இருசக்கர வாகனம் மீது லாரி மோதிய விபத்தில் மனைவி படுகாயமடைந்த நிலையில் அவரது கணவர் சம்பவ இடத்திலேயே உயிரிழந்தார்.

திருவாரூர் மாவட்டம் கீழ் காலனி பகுதியைச் சேர்ந்தவர் அழகுசுந்தரம் (28). இவரது மனைவி சரண்யா (25). இவர்களுக்குத் திருமணமாகி ஆறு மாதங்கள் ஆன நிலையில் இருவரும் தங்களுடைய இருசக்கர வாகனத்தில் உறவினர் வீட்டுக்கு நன்னிலம் நோக்கி சென்று கொண்டிருந்தனர். அப்போது நீலக்குடி அருகேயுள்ள மத்தியப் பல்கலைக்கழகம் அருகே வேகமாக வந்த லாரி ஒன்று கட்டுப்பாட்டை இழந்து அவர்கள் மீது மோதியது.

இதில், அழகுசுந்தரம் சம்பவ இடத்திலேயே உயிரிழந்தார். படுகாயமடைந்த சரண்யாவை அக்கம்பக்கத்தினர் மீட்டு அரசு மருத்துவமனைக்கு அனுப்பி வைத்தனர். விபத்து குறித்து தகவலறிந்து வந்த காவல் துறையினர் அழகுசுந்தரத்தின் உடலை மீட்டு உடற்கூராய்வுக்காக திருவாரூர் அரசு மருத்துவக் கல்லூரி மருத்துவமனைக்கு அனுப்பி வைத்தனர். அங்கு அவருக்கு தீவிர சிகிச்சையளிக்கப்பட்டு வருகிறது.

இதனிடையே, விபத்தை ஏற்படுத்திவிட்டு நிற்காமல் சென்ற லாரி குறித்து உடனடியாக அப்பகுதி மக்கள் நெடுஞ்சாலைத்துறை ரோந்து காவல் துறையினருக்குத் தகவல் கொடுத்தனர். இதன்பேரில் லாரியை விரட்டிச் சென்ற காவல் துறையினர், குடவாசல் அருகே லாரியை மடக்கிப் பிடித்து லாரி ஓட்டுநரை கைது செய்தனர்.

பின்னர், லாரி ஓட்டுநரிடம் நடத்திய விசாரணையில், அவர் நன்னிலம் இடையூறைச் சேர்ந்த சுரேஷ் என்பது தெரியவந்தது. இதையடுத்து அவரை கைது செய்து காவல் துறையினர் விசாரணை நடத்தி வருகின்றனர்.

இதையும் படிங்க:குன்னூரில் வெடி விபத்து: மூவர் படுகாயம்!