காவல் நிலையம் அருகே மனைவியை கத்தியால் குத்திய தொழிலாளி - திருவாரூரில் பரபரப்பு!

திருவாரூர்: காவல் நிலையம் அருகே மனைவியை கத்தியால் குத்திவிட்டு தற்கொலைக்கு முயன்றவரை காவல் துறையினர் மீட்டு சிகிச்சைக்காக அரசு மருத்துவமனையில் சேர்த்தனர்.

திருவாரூர் மாவட்டம் சேந்தமங்கலம் பகுதியைச் சேர்ந்தவர்கள் வீரமணி - பத்மாவதி தம்பதி. இவர்களுக்கு ஆறுவயதில் பெண்பிள்ளை ஒன்று உள்ளது. இந்நிலையில் தம்பதிகளுக்கு இடையே கடந்த சில தினங்களுக்கு முன்பு ஏற்பட்ட தகராறில் பத்மாவதி கோபித்துக் கொண்டு திருச்சிக்கு சென்றுள்ளார்.

இதையறியாத வீரமணி திருவாரூர் தாலுகா காவல்நிலையத்தில் மனைவியை காணவில்லை என்று புகார் அளித்துள்ளார். புகாரின் பேரில் காவல் துறையினர் வழக்குப்பதிவு செய்து பத்மாவதியை தேடிவந்தனர். கணவர் காவல்துறையினர் தேடுவதை அறிந்த பத்மாவதி, வழக்கறிஞர் ராஜேந்திரன் என்பவருடன் தாலுகா காவல் நிலையத்தில் நேற்று ஆஜரானார். அப்போது அங்கிருந்த வீரமணிக்கும் அவரது மனைவி பத்மாவதிக்கும் இடையே தகராறு ஏற்பட்டுள்ளது.

இதில், ஆத்திரமடைந்த வீரமணி மறைத்து வைத்திருந்த கத்தியால் மனைவி பத்மாவதியை குத்தி விட்டு, அவரும் கத்தியால் குத்திக்கொண்டு தற்கொலைக்கு முயன்றார். பத்மாவதியின் அலறல் சத்தம் கேட்டு காவல் நிலையத்தில் இருந்து ஓடிவந்த காவலர்கள் இருவரையும் மீட்டு சிகிக்கைச்காக அரசு மருத்துவக் கல்லூரி மருத்துவமனைக்கு அனுப்பி வைத்தனர். பின்னர் இது தொடர்பாக வழக்குப்பதிவு செய்து காவல் துறையினர் விசாரணை மேற்கொண்டு வருகின்றனர்.

இதையும் படிங்க : குடும்பம் நடத்த மறுத்த மனைவி - நண்பர்களுடன் சேர்ந்து கொலை செய்த கணவன்!