திருவாரூரில் ரூ.1.50 லட்சம் மதிப்புள்ள மதுபாட்டில்கள் பறிமுதல்: இருவர் கைது!

திருவாரூர்: புதுச்சேரியிலிருந்து சட்ட விரோதமாக கடத்திவரப்பட்ட ரூ.1.50 லட்சம் மதிப்புள்ள மதுபாட்டில்களை கைப்பற்றிய காவல்துறையினர், இது தொடர்பாக இருவரை கைது செய்தனர்.

திருவாரூர் மாவட்டம் நன்னிலம் அருகே உள்ள பேரளத்தில் மதுவிலக்கு அமலாக்கப் பிரிவு காவல் துறையினர் வாகன சோதனையில் ஈடுபட்டிருந்தனர். அப்போது, காரைக்காலிருந்து அதிவேகமாக வந்த வாகனத்தை தடுத்து நிறுத்தி சோதனை செய்தனர்.

அந்த வாகனத்தில் இருந்து சட்ட விரோதமாக, 18 சாக்கு மூட்டைகளில் கடத்தி வரப்பட்ட 2,700 மது பாட்டில்களை மதுவிலக்கு அமல்பிரிவு காவல் துறையினர் பறிமுதல் செய்தனர்.

பின்னர் விசாரணை மேற்கொண்டதில், நாகை மாவட்டம் தரங்கம்பாடியைச் சேர்ந்த ஜெயகாந்தன், மகேந்திரன் ஆகிய இருவரும் சட்ட விரோதமாக சுமார் ரூ.1.50 லட்சம் மதிப்புள்ள மது பாட்டில்களை புதுச்சேரியிலிருந்து கடத்தி வந்தது தெரியவந்தது. இதனைத் தொடர்ந்து கடத்தலில் ஈடுபட்ட இருவரையும் காவல்துறையினர் கைது விசாரணை நடத்தி வருகின்றனர்.

இதையும் படிங்க:ஆசிரியர் மீது மாணவிகள் பாலியல் புகார்!