திருவண்ணாமலை அருணாசலேஸ்வரர் கோயிலில் டிசம்பர் 1ஆம் தேதி கொடியேற்றத்துடன் கார்த்திகை தீப திருவிழா தொடங்கி நடைபெற்றுவருகிறது. 7ஆவது நாளான இன்று மகா தேரோட்டம் எனப்படும் 5 தேர்கள் பவனி தேரோட்டம் நடைபெற்றது. அதில் முதலாவதாக விநாயகர் தேர் ஊர்வலம் நடைபெற்றது. அதைத் தொடர்ந்து சுப்பிரமணியர் தேர் மாடவீதியில் பவனி வந்தது.
இதையடுத்து, மதியம் 3 மணியளவில் உண்ணாமலையம்மன் சமேத அண்ணாமலையார் பெரிய தேர் எனப்படும் மகாரத ஊர்வலம் வந்தது. ஊர்வலத்தை இந்து சமய அறநிலையத் துறை அமைச்சர் சேவூர் ராமச்சந்திரன் வடம் பிடித்து இழுத்து தொடங்கி வைத்தார். ஆயிரக்கணக்கான பக்தர்கள் அண்ணாமலையாருக்கு அரோகரா என்ற கோஷம் விண்ணைப் பிளக்க, தேரை வடம்பிடித்து இழுத்தனர்.