நியாயவிலைக் கடையில் தனிநபர் இடைவெளியைக் கடைபிடிக்காத பொதுமக்கள்!

திருவண்ணாமலை: நியாயவிலைக் கடையில் முகக் கவசம் அணியாமலும் தனிநபர் இடைவெளியைக் கடைபிடிக்காமலும் பொதுமக்கள் அத்தியாவசியப் பொருள்கள் வாங்குவதற்கு குவிந்தனர்.

திருவண்ணாமலை மாவட்டம் அண்ணாமலை கோயில் அருகேயுள்ள கோபுரம் 1-வது தெருவில் நியாய விலைக் கடை இயங்கி வருகிறது. இந்த நியாய விலைக் கடையில் நேற்று விற்பனைத் தொடங்கியது.

இதையடுத்து, அத்தியாவசியப் பொருள்களை வாங்குவதற்கு ஆண்களும், பெண்களும் குவிந்தனர். அப்போது, பொருள்கள் வாங்க வந்தவர்கள் முகக் கவசம் ஏதும் அணியாமலும் தனிநபர் இடைவெளியைக் கடைபிடிக்காமல் பொருள்களை வாங்கிச் செல்கின்றனர். இதைத் தொடர்ந்து, ஒருவரையொருவர் முட்டிமோதி பொருள்களை வாங்குவதில் மும்முரம் காட்டினர்.

அப்போது, இவர்களை ஒழுங்குபடுத்த விற்பனையாளர் முயற்சி செய்த போதும் பொதுமக்கள் அதை பொருட்படுத்தவில்லை. இது கரோனா நோய்த் தொற்று பரவுவதற்கு வாய்ப்பாக அமைந்துள்ளது.

எனவே அத்தியாவசியப் பொருள்கள் வாங்க வருபவர்கள் தனிநபர் இடைவெளியுடன் முகக் கவசம் அணிந்து வர வேண்டும் என சமூக ஆர்வலர்கள் கேட்டுக் கொண்டுள்ளனர்.

இதையும் படிங்க:கரோனா: இரண்டு கிராமங்களுக்கு சீல்