காதல் திருமணத்திற்கு எதிர்ப்பு: தற்கொலை செய்த தம்பதி!

திருவண்ணாமலை: காதல் திருமணம் நடுந்து 45 நாட்கள் ஆகிய நிலையிலும் திருமணத்திற்கு தொடர்ந்து எதிர்ப்பு தெரிவித்த பெண்ணின் வீட்டாரால் மனமுடைந்து தம்பதி தற்கொலை செய்துகொண்டனர்.

திருவண்ணாமலை மாவட்டம் தானிப்பாடி அடுத்த மோத்தக்கல் பகுதியைச் சேர்ந்தவர் கூலி தொழலாளி வேடியபப்பன். இவரது மகன் ஜெயக்குமார் (24). கிருஷ்ணகிரி மாவட்டம் கல்லூர் கிராமத்தைச் சேர்ந்த விஜயா (22). இருவரும் காதலித்து திருமணம் செய்துகொண்டனர்.

திருமணமாகி 45 நாள்கள் ஆகியும் பெண்ணின் வீட்டார்கள் திருமணத்திற்கு தொடர்ந்து எதிர்ப்பு தெரிவித்தனர். மேலும் தங்களுக்கு, அப்பெண்ணிற்கும் இனி எந்த தொடர்பும் கிடையாது என அப்பெண்ணின் வீட்டார்கள் கூறியதாக தெரிகிறது. இதனால், மனமுடைந்த விஜயா இன்று தனது கணவர் வீடடில் தூக்கிட்டு தற்கொலை செய்துகெண்டார்.

இதனையறிந்த விஜயாவின் கணவர் ஜெயக்குமார், இனி என் காதல் மனைவி இல்லாமல் வாழ முடியாது என அவரும் வீட்டில் தூக்கிட்டு தற்கொலை செய்துகொண்டார்.

இது குறித்து தகவலறிந்து சம்பவ இடத்திற்கு வந்த காவல் துறையினர் தற்கொலை செய்துகொண்ட இளம் காதல் தம்பதியின் உடலை மீட்டு உடற்கூறாய்வுக்காக திருவண்ணாமலை அரசு மருத்துவக் கல்லூரி மருத்துவமனைக்கு அனுப்பிவைத்தனர்.

மேலும், இச்சம்பவம் குறித்து வழக்குப்பதிவு செய்த காவல் துறையினர் தற்கொலைக்கு வேறேதும் காரணம் இருக்கிறதா? என விசாரணை நடத்திவருகின்றனர்.

இதையும் படிங்க: மாதவிடாய் வலி: மாணவி தற்கொலை!