திருவண்ணாமலை அருள்மிகு அருணாச்சலேஸ்வரர் திருக்கோயில் தீபத் திருவிழாவின் போது லட்சக்கணக்கான பக்தர்கள் திருவண்ணாமலைக்கு வந்தனர். மகா தீபத்தின் போது பக்தர்கள் துணிப்பை, சணல் பை மற்றும் சுற்றுச்சூழலுக்கு உகந்த பைகளை எடுத்து வருவோருக்கு வெள்ளி நாணயம், தங்க நாணயம் பரிசாக வழங்கப்படும் என்று திருவண்ணாமலை மாவட்ட மாசுக் கட்டுப்பாட்டு வாரியம் அறிவித்திருந்தது.
இதன் அடிப்படையில் சுற்றுச்சூழலுக்கு உகந்த பைகளைக் கொண்டு வந்த பொது மக்களுக்கு 9ஆம் தேதி மாலை 6 மணி முதல் 10ஆம் தேதி மாலை 6 மணிவரை குலுக்கல் முறையில் தங்க நாணயத்திற்கு 12 பேரும், வெள்ளி நாணயத்திற்கு 72 பேரும் தேர்வு செய்யப்பட்டனர். இதில் தேர்வு செய்யப்பட்ட ஒரு நபருக்கு மாவட்ட ஆட்சியர் கே.எஸ். கந்தசாமி, தனது அலுவலகத்தில் தங்க நாணயத்தைப் பரிசாக வழங்கினார்.