திருவண்ணாமலை:ஆரணி அருகே கண்ணமங்கலம் அடுத்த கொளத்தூர் கிராமத்தில் வருட வருடம் மார்கழி அமாவாசை முன்னிட்டு காளை விடும் விழா நடைபெறுவது வழக்கம். ஆனால் இந்த ஆண்டு காளை விடும் விழா நடத்த மாவட்ட நிர்வாகம் அனுமதி வழங்கவில்லை.
ஆனால் வேலூர் மாவட்டத்தில் உள்ள 125 கிராமங்களுக்கு காளை விடும் விழா நடத்த அம்மாவட்ட நிர்வாகம் அனுமதி அளித்துள்ளது. இதனால், வேலூரில் அனுமதியளித்தது போல் திருவண்ணாமலை மாவட்டத்திலும் காளை விடும் விழாவிற்கு அனுமதி வழங்க வேண்டும் என அப்பகுதி மக்கள் கோரிக்கை விடுத்து வந்தனர்.
இந்நிலையில், மாவட்ட நிர்வாகத்தின் அனுமதி பெறாமல் கொளத்தூர் கிராமத்தில் 55ஆம் ஆண்டு காளை விடும் விழா நேற்று(ஜன.2) காலை தடையை மீறி நடைபெற்றது. இந்த விழாவிற்கு வேலூர், ராணிப்பேட்டை, காஞ்சிபுரம், கிருஷ்ணகிரி போன்ற மாவட்டங்களில் இருந்து சுமார் 500க்கும் மேற்பட்ட காளைகள் பங்கேற்றன.
தூக்கி வீசப்பட்ட பெண்
இதில் சுமார் 1000க்கும் மேற்பட்ட மாடுபிடி வீரர்கள் கலந்து கொண்டனர். இந்த காளைவிடும் விழாவில் சீறிப்பாய்ந்த காளைகள் அப்பகுதியில் இருசக்கர வாகனத்தில் சென்ற தம்பதியை முட்டி தூக்கி வீசியது.இதில் வாகனத்தில் பின்புறத்தில் அமர்ந்திருந்த பெண்ணுக்கு பலத்த காயம் ஏற்பட்ட நிலையில் அரசு மருத்துவமனையில் அனுமதிக்கப்பட்டுள்ளார்.
மேலும், இதில் கலந்துகொண்ட மாடுபிடி வீரர்கள் 50க்கும் மேற்பட்டோர் காயமடைந்து மருத்துவமனைக்கு கொண்டு செல்லப்பட்டனர். தகவல் அறிந்த கண்ணமங்கலம் காவல்துறையினர் காளை விடும் இடத்திற்கு விரைந்து சென்று காளை விடும் விழாவை நிறுத்தினர். மேலும் தடையை மீறி காளை விடும் விழா நடத்திய முக்கிய நிர்வாகிகள் ஐந்து பேர் மீது கண்ணமங்கலம் காவல்துறையினர் வழக்கு பதிவு செய்துள்ளனர்.
இதையும் படிங்க : சாலை விபத்துகளில் தொடர்ந்து உயிரிழக்கும் சிறுத்தைகள்
