குடிபோதையில் கணவர் தகராறு: "அம்மிக்கல்லால்" கொலை செய்த மனைவி

திருவள்ளூர்: குடிபோதையில் தகராறு செய்த கணவனின் தலையில் அம்மிக் கல்லை போட்டு கொடூரமாக கொலை செய்த மனைவியை, காவல் துறையினர் கைது செய்தனர்.

திருவள்ளூர் மாவட்டம், வெங்கல் காவல் நிலைய எல்லைக்கு உட்பட்ட கொமக்கம்பேடு கிராமத்தில் வசித்து வந்தவர் வேலு(40). கொத்தனாராக வேலை செய்து வந்த இவர், தினமும் குடித்து விட்டு மனைவி ஞானம்மாளை அடித்து துன்புறுத்தி வந்ததாகக் கூறப்படுகிறது.

இந்த நிலையில், நேற்று இரவு வழக்கம்போல் மது அருந்திவிட்டு வீட்டிற்கு வந்த வேலு, மனைவியிடம் தகராறு செய்துள்ளார். இதனால், ஆத்திரமடைந்த ஞானம்மாள், கணவர் தலையில் அம்மிக் கல்லைப் போட்டுள்ளார். இதில் படுகாயமடைந்த வேலு, ரத்த வெள்ளத்தில் சம்பவ இடத்திலேயே பலியானார்.

தகவலறிந்து சம்பவ இடம் சென்ற வெங்கல் காவல்துறையினர், வேலுவின் உடலைக் கைப்பற்றி உடற்கூறாய்வுக்காக திருவள்ளூர் அரசு மருத்துவமனைக்கு அனுப்பி வைத்தனர். மேலும், ஞானம்மாளை கைது செய்து விசாரித்து வருகின்றனர்.

இந்த சம்பவம் கொமக்கம்பேடு சுற்றுவட்டாரப் பகுதிகளில் அதிர்ச்சியை ஏற்படுத்தியுள்ளது.