'அரசு புறம்போக்கு, நீர்நிலைகளில் வசிப்போருக்கு வீட்டுமனை பட்டா - மாவட்ட ஆட்சிய அலுவலகம் முற்றுகை

அரசு புறம்போக்கு, நீர் நிலைகளில் நீண்டகாலமாக குடியிருந்து வரும் மக்களுக்கு வீட்டுமனை பட்டா அளிக்க வலியுறுத்தி இந்திய கம்யூனிஸ்ட் கட்சி(மார்க்சிஸ்ட்)யினர் திருவள்ளூர் மாவட்ட ஆட்சியர் அலுவலகத்தை முற்றுகையிட்டனர்.

திருவள்ளூர்: இந்திய கம்யூனிஸ்ட் கட்சி (மார்க்சிஸ்ட்) திருவள்ளூர் மாவட்ட குழு சார்பில் சுமார் 1000-க்கும் மேற்பட்டோர், மாவட்ட ஆட்சியர் அலுவலகத்தை இன்று (மே 06) முற்றுகையிட்டு போராட்டம் நடத்தினர். போராட்டத்தின்போது, பல ஆண்டுகளாக தண்ணீர் தேங்காத, இனியும் தண்ணீர் தேங்க வாய்ப்பில்லாத கரம்பாக உள்ள நீர்நிலை புறம்போக்கு நிலங்களில் வசிக்கும் மக்களுக்கு பட்டா வழங்கவேண்டும் என்றும், நீதிமன்ற உத்தரவை காரணம் காட்டி வீடுகளை அப்புறப்படுத்தும் நடவடிக்கையை கைவிட வேண்டும் என்றும் வலியுறுத்தினர்.

மாற்று இடம் என்ற பெயரில் உள்ளூரில் வசிக்கும் மக்களை வெகுதூரத்திற்கு மாற்றுவதை நிறுத்தி முன்பு குடியிருந்த பகுதியின் அருகேயே மாற்று இடம் வழங்க வேண்டும் என்றும், அனைத்து கோவில் இடங்களில் வசிக்கும் மக்களுக்கு உடனடியாக பட்டா வழங்க வேண்டும் என்றும் கேட்டுக்கொண்டனர்.

அரசு புறம்போக்கு மற்றும் இதர வகை இடங்களில் வசிக்கும் மக்களுக்கு பட்டா வழங்க வேண்டும் என்றும், ஏழை எளிய மக்களுக்கு வழங்கும் வீடு கட்டும் திட்ட தொகையினை ரூ.5 லட்சமாக உயர்த்தி வழங்கவேண்டும் உள்ளிட்ட கோரிக்கைகளை வலியுறுத்தி முழக்கமிட்டனர். மாவட்ட ஆட்சியர் அலுவலகம் உள்ளே நுழைய முயன்றவர்களை போலீசார் தடுத்து நிறுத்தி, முக்கியப் பிரமுகர்களை மட்டும் மாவட்ட ஆட்சியரிடம் அழைத்துச்சென்று மனுவைக் கொடுத்த அனுமதித்தனர்.

இதையும் படிங்க: "குடிசை பகுதி மக்களை மறுகுடியமர்வு" வரைவு அறிக்கையை தமிழில் வெளியிடுக!